ଧାଇଁ ଯାଆନ୍ତି ପୁରୀ

ମନ ଚାହୁଁଛି-ଜଗାକାଳିଆ

ଲଗାନ୍ତା ଯଦି ଡୋରି,

ତା' ଦେଖା ପାଇଁ ବାଉଳି ହୋଇ

ଧାଇଁ ଯାଆନ୍ତି ପୁରୀ ।

ନିଅନ୍ତି ସାଥେ ତା' ଲାଗି କିଛି

ସୁଆଦ ଚିଜ କରି, 

ସରୁ ଚକୁଳି, ଆରିସା, ମଣ୍ଡା

ଏଣ୍ଡୁରି ଆଉ ଖିରି ।

ବୁଲି ଦେଖନ୍ତି ଶ୍ରୀକ୍ଷେତ୍ର ଧାମ

ସରାଗେ ମୁହିଁ ଅତି,

ବଡ଼ ଦାଣ୍ଡରେ ମୁଣ୍ଡିଆ ମାରି

ଆନନ୍ଦେ ଗଡ଼ିଯା'ନ୍ତି ।

ଚକାଆଖିକୁ ଦେଖିକି ତା'ର

ଯୋଡ଼ି ଦିଅନ୍ତି ହାତ,

ଆପଣାଛାଏଁ ଗାଇ ଉଠନ୍ତି

"ଜୟ ଶ୍ରୀ ଜଗନ୍ନାଥ" ।

ସାଥିରେ ନେଇଥିବା ଦରବ

ଦିଅନ୍ତି ମନେ କରି,

ମହାପ୍ରସାଦ ଖାଆନ୍ତି ତା'ର

ଖୁସିରେ ମନ ଭରି ।

ବାକି ଯେତେକ ତିରିଥ ସେଠି

ଦେଖନ୍ତି ଗୋଟି ଗୋଟି,

ଏତେକ ଯଦି କରନ୍ତା କୃପା

ଧନ୍ୟ ମୁଁ ହୋଇଯା'ନ୍ତି ।