ଦେଖରେ ପିଲେ ଦେଖ

ଟୁପୁରୁ ଟାପୁର ବରଷେ ପାଣି

ବାଜେ ବାଇଦ ବାଜା

ବାହା ହୋଇବ ବେଙ୍ଗୁଲୀ ରାଣୀ

ଆସିବେ ବେଙ୍ଗ ରଜା ।

ବାଜେ ତେଲିଙ୍ଗି ଯୋଡି ମହୁରୀ

ଝିଣ୍ଟିକା କରେ ନାଚ

ବସିଛି ଛକି ବଗୁଲୀ କାଣ୍ଟି

ଧରିବ ବୋଲି ମାଛ ।

ଘୁମୁରୁଛନ୍ତି ପାରା ଯୋଡିକ 

ଭାଟିରେ ଗୁଞ୍ଜି ଗାଞ୍ଜି

କେମିତି ଯିବେ ଆହାର ଖୋଜି

ଡେଣା ତ ଯାଏ ଭିଜି ।

ମୁଣ୍ଡରେ ରଖି ପଖିଆ ଝାମ୍ପି

ବିଲକୁ ଯାଏ ଚାଷୀ

ବେଉଷିବ ସେ ଘାସ ବାଳୁଙ୍ଗା

ଧାନକୁ ବାଛି ବସି ।

ପିନ୍ଧିଛି କିଏ ତାର ବର୍ଷାତି

ଖୋଲିଛି କିଏ ଛତା

ବସି ନରହି କରିଲେ କାମ

ମିଳେ ପଇସା ଟଙ୍କା ।

ଝରକା ଖୋଲି ଦେଖରେ ପିଲେ

ଲାଗିବ ବଡ ମଜା

ଅନ୍ଧାର କୋଣେ ଶୁଅଇ ପେଚା

ଅଣ୍ଟା ତା ବଙ୍କା କୁଜା ।