ଦେଖିବା ଆସ

ଦେଖିବା ଆସ ଟିକି ଚଢ଼େଇ

ଟିକି ଡେଣାଟି ଝାଡ଼ି

ନୀଳ ଆକାଶେ ସୁଦୂର ଦେଶେ

ଯାଉଛି କେହ୍ନେ ଉଡ଼ି |

ସକାଳୁ ଯାଏ ସଂଜକୁ ଆସେ

ଆନନ୍ଦେ ଚରିବୁଲି

କେମିତି ପାଏ ନିଜର ନୀଡ଼

ଯାଏନା ବାଟ ଭୁଲି |

ଦେଖିଛ ପିଲେ ଜୁଳୁଜୁଳିଆ

ଗଛରେ ବୁଦା ପରେ

ମିଞ୍ଜି ମିଞ୍ଜିକା ଆଲୁଅ ଦିଏ

ଚାନ୍ଦରେ ବାଦ କରେ |

ଦେଖିଛ କେବେ ପୁନେଇ ଜହ୍ନ

ଶୋଭିତ ନୀଳାମ୍ବରେ

ସାଗରେ ଉଠେ ନୀଳ ଲହରୀ

ଗରଜେ ଘୁ ଘୁ ସ୍ୱରେ |

ଟିକି ପିମ୍ପୁଡି ବାନ୍ଧିକି ଧାଡ଼ି

ଚାଳନ୍ତି ବସୁଧାରେ

ଏଡ଼େ ଶୃଙ୍ଖଳା ଏଡ଼େ ଏକତା

ଦେଖା ନାହିଁ କା ଠାରେ |

ଖାଦ୍ୟକୁ ବୋହି ଗାତରେ ନେଇ

ସାଇତି ଯତନରେ

ବରଷା ଦିନେ ବସି ଖାଆନ୍ତି

ଦେଖିଛ ସ୍ୱନେତ୍ରରେ |

ମହୁମାଛିଟି ଫୁଲରୁ ଫୁଲ

ଗୁଞ୍ଜରି ଉଡୁଥାଏ

ଫୁଲରୁ ରସ ଶୁଣ୍ଢରେ ଶୋଷି

ମହୁ ସେ କରିଥାଏ |

ପର୍ବତୁ ଝରି ଟିକି ଝରଣା

ତଟିନୀ ରୂପ ଧରେ

ଟିକି ପ୍ରଦୀପ ଘନ ଅନ୍ଧାରେ

ଆଲୋକ ଦାନ କରେ |

ଟିକି ଭିତରେ ଦେଖିବ ଥାଏ

ବଡ଼ର ସମ୍ଭାବନା

ସାନ ବୋଲି କି ହୋଇବନାହିଁ

କେବେ ବି କ୍ଷୁଦ୍ରମନା |