ଦେଖେଇ ଜାଣେନା ବୋଲି

ଦେଖେଇ ଜାଣେନା ବୋଲି,

ଆଦେଖା ମୁଁ ରହିଗଲି

କିଏ ବା ଜାଣିବ କାହୁଁ

ଦେଖେଇ ଜାଣେନା ବୋଲି ।

ନ ତିଅଣ ଛ ଭଜା

ପରସି ଆସୁଛି ନିତି

ଆଦର ପାଏନା କିନ୍ତୁ,

ଚଖେଇ ଜାଣେନା ବୋଲି ।

ସମ୍ପର୍କର ସୂତା ଖିଅ,

ଅଡ଼ୁଆ କେମିତି ହେଲା

ମୁଠେଇ ଧରି ତ ଥିଲି,

ଗୁଡେଇ ଜାଣେନା ବୋଲି ।

ବାଟ ଦେଖେଇ ଥିଲି ମୁଁ,

ଚାଲୁଛ ବି ସେହି ପଥେ

ଗୁରୁ ହୋଇ ପାରିଲିନି,

ଶିଖେଇ ଜାଣେନା ବୋଲି ।

ତୁମେ ସିନା ଭୁଲିଗଲ,

ତୁମକୁ ମୁଁ ଭୁଲିନାହିଁ

ମନ ତଳେ ସାଇତିଛି,

ହଜେଇ ଜାଣେନା ବୋଲି ।

ହସ ଟିକେ ବାଣ୍ଟିବାର

ପ୍ରତିଶ୍ରୁତି ଦେଇଥିଲି।

ଲୁଚି ଲୁଚି କାନ୍ଦୁଛି ମୁଁ

କନ୍ଦେଇ ଜାଣେନା ବୋଲି ।

ଭାବିଥିଲି ଚୋରେଇବି,

ତୁମଠୁଁ ତୁମର ମନ।

ହେଲେ ଧାରା ପଡ଼ିଗଲି,

ଚୋରେଇ ଜାଣେନା ବୋଲି ।

ସରଗ କୁ ନିଶୁଣିଟେ ,

ଆଜି ବି ବାନ୍ଧୁଛି ନିତି।

ନୋହେ ବିରତ ବାମନ

ହାରିବା ଜାଣେନା ବୋଲି ।