ଦେବ ଶିଳ୍ପୀ ବିଶ୍ବକର୍ମା
ଦେବ ଶିଳ୍ପୀ ବିଶ୍ବକର୍ମା
ସ୍ବର୍ଗ ପୁରେ ଦେବତାଙ୍କ ବାସସ୍ଥାନ
ରାଜା ତାର ସଚୀପତି
ସୁଧର୍ମା ସଭାରେ ଅଧିଷ୍ଠାନ କରି
ବିଚାର କରନ୍ତି ନିତି ।
ସବୁ ଦେବତାଙ୍କ ମଧ୍ୟରେ ସେ କାର୍ଯ୍ୟ
ଇନ୍ଦ୍ରଦେବ ବାଣ୍ଟି ଥାନ୍ତି
ପବନ ଦେବତା ତାଙ୍କରି ନିର୍ଦ୍ଦେଶେ
ଚାମର ନିତି ବିଞ୍ଚନ୍ତି ।
ପବନ ବହଇ ଅନଳ ଦହଇ
ସର୍ବେ ନିଜ କାର୍ଯ୍ୟେ ରତ
ଦେବ ଶିଳ୍ପୀ ବିଶ୍ବକର୍ମା ବିନ୍ଧାଣୀ ସେ
ନିର୍ମାଣରେ ସିଦ୍ଧ ହସ୍ତ ।
ସ୍ବର୍ଣ୍ଣମୟୀ ଲଙ୍କା ପବନ ନନ୍ଦନ
ମାରୁତି ଦହନ କଲେ
ରାବଣର କ୍ରୋଧ ଶାନ୍ତ ପାଇଁ ଇନ୍ଦ୍ର
ବିଶ୍ବକର୍ମାକୁ ରାଇଲେ ।
ପୂର୍ବଠାରୁ ଶତ ଗୁଣ ସୌନ୍ଦର୍ଯ୍ଯରେ
ଲଙ୍କା ପୁର ନିର୍ଭା କଲେ
ଶୋକ ଦୂର ପାଇଁ ଅମୋହ ମଣିକୁ
ରାବଣେ ପ୍ରଦାନ କଲେ ।
ତ୍ରିପୁରାସୁର ଆଦେଶେ ବିଶ୍ବକର୍ମା
ତ୍ରିପୁର କଲେ ନିର୍ମାଣ
ମହାଦେବ ମହେଶ୍ବର ତ୍ରିଲୋଚନେ
କରିଲେ ତାକୁ ଦହନ ।
ବିଷ୍ଣୁଙ୍କ ଆଜ୍ଞାରେ ଇନ୍ଦ୍ରପ୍ରସ୍ଥ ନଗ୍ର
ବିଶ୍ବକର୍ମା ତୋଳି ଦେଲେ
ଏମିତି ସୌନ୍ଦର୍ଯ୍ଯ ବିମୋହିତ ଦୃଶ୍ୟ
ଦେଖି ସର୍ବେ ପ୍ରୀତ ହେଲେ ।
ନଗ୍ର ଦେଖି ଦୁର୍ଯ୍ୟୋଧନ ସ୍ତମ୍ଭୀଭୂତ
ହୋଇଲେ ବିସ୍ମିତ ଅତି
ସ୍ଥଳ ଭାବି ଜଳେ ପାଦ ଦେଲେ ଯେବେ
ପଡିଗଲେ କୁରୁ ପତି ।
ବିଚିତ୍ର ବିନ୍ଧାଣୀ ବିଚିତ୍ର ନିର୍ମାଣ
ଆଖି ଝଲସାଇ ଦିଏ
କ୍ଷଣିକ ମଧ୍ୟରେ କରନ୍ତି ନିର୍ମାଣ
ଦେବ ଶିଳ୍ପୀ ପରା ସିଏ ।
ବଳଦେବ ବୋଲେ ପ୍ରଭୁ ଜଗନ୍ନାଥ
ମହାଲକ୍ଷ୍ମୀଙ୍କୁ ତଡିଲେ
ମାତାଙ୍କ ଆଦେଶେ ଦେବ ବିଶ୍ବକର୍ମା
ଲକ୍ଷ୍ମୀ ଉଆସ ତୋଳିଲେ ।
ବିଶ୍ବାବସୁ ଭଣ୍ଡି ମହୋଦଧି ଜଳେ
ନୀଳମାଧବ ଆସିଲେ
ସମୁଦ୍ର ତୀରରେ ପୁରୀ ଶ୍ରୀକ୍ଷେତ୍ରରେ
ଦାରୁ ରୂପରେ ଲାଗିଲେ ।
ଇନ୍ଦ୍ରଦ୍ଯୁମ୍ନ ରାଜା ଗୁଣ୍ଡିଚା ରାଣୀଙ୍କ
ଆଦେଶେ ହୁଏ ନିର୍ମିତ
ଦେବ ଶିଳ୍ପୀ ବିଶ୍ବକର୍ମା ବୃଦ୍ଧ ରୂପେ
କରିଲେ ନେଇ ଦାୟିତ୍ବ ।
ଏକୋଇଶ ଦିନ ନ ପୂରିବା ଆଗୁ
ଦ୍ୱାର କବାଟ ଖୋଲିଲେ
ଅଧାଗଢା ତିନି ମୂରତୀ ଦେଖିଣ
ସର୍ବେ ଚକିତ ହୋଇଲେ ।
ରହିଗଲ ପ୍ରଭୁ ଅଧା ଗଢା ହେଇ
ଏଇ ଳୀଳାଚଳ ଧାମେ
ଦେବ ଶିଳ୍ପୀ ବିଶ୍ବକର୍ମା ପାଇଁ ଆଜି
ଦର୍ଶନ କରୁଛୁ ଆମେ ।
ତୁମ ଜନ୍ମ ଦିନେ ତୁମରି ଚରଣେ
କରୁଛି ଭକ୍ତି ପ୍ରଣତି
ଏ ଧରା ଧାମରେ ତୁମରି ପୂଜାରେ
ଭକ୍ତେ କରନ୍ତି ଆଳତୀ ।
ଯନ୍ତ୍ର କୌଶଳରେ ପୁର ନିର୍ମାଣରେ
ତୁମେ ଅଟ ସିଦ୍ଦ ହସ୍ତ
ହେ ଦେବଶିଳ୍ପୀ ବିଶ୍ବକର୍ମା ତୁମ
ପାଦେ ଭକ୍ତି ପ୍ରଣିପାତ ।