ଡଙ୍ଗା
ଡଙ୍ଗା
କଦଳୀ ବାହୁଙ୍ଗା ଅବା ସୋଲ ଡ଼ଙ୍ଗା
ପୂର୍ବ ଦିନ ଗଢି ଦେଇ,
ନାନା ରଙ୍ଗ ଦେଇ ଚିତ୍ର ବି ବନାଇ
ଡଙ୍ଗାଟି ଦେବା ସଜେଇ ।
ଆସଲୋ ସଜନୀ ପାହୁଛି ରଜନୀ
ଡଙ୍ଗା ଭସାଇବା ଆସ,
ପୁଣ୍ୟତୋୟା ନଦୀ ଜଳରେ ଗାଧୋଇ
ଡଙ୍ଗା ସଜାଇବା ବଶ ।
ଫୁଲ ଫଳ ଦୁବ ବରକୋଳି ପତ୍ର
ଧୂପ ଦୀପ ଭୋଗ ଦେଇ,
ପାନ ଖଣ୍ଡେ ଥୋଇ ଡଙ୍ଗା ଭସାଇବା
ଆ କା ମା ବୈ କହି ।
ଉତ୍କଳର ଗର୍ବ ଥିଲେ ସେ ସାଧବ
ଡଙ୍ଗା ବାହି ଯାଉଥିଲେ,
ଦୂର ବିଦେଶରେ ବାଣିଜ୍ୟ କରି ସେ
ସ୍ଵଦେଶକୁ ଫେରୁଥିଲେ ।
ଆମ ପରମ୍ପରା ଅତୀବ ନିଆରା
ପାଳୁଥିବା ଦେଇ ଧ୍ୟାନ,
ଆମେ ଉତ୍କଳୀୟ ଆମରି ସଂସ୍କୃତି
ଅଟେ ଆମ ଅଭିମାନ ।