ଚଉପଦୀ ଧର୍ମୀୟ-102

ଚଉପଦୀ

ଭାଗ (102)

କୋଳାହଳ - ଆଠତାଳି

(ଧର୍ମୀୟ ଓ ରାଗାନୁଗା ଭକ୍ତିମୂଳକ)

ଜାଣି ନାହିଁ କି ମୁଁ ଶ୍ୟାମ - ସ୍ନେହ ଗୋ (ଘୋଷା)

ଆଉ କି ଜଣାଥିଲେ କହ ଶୁଣିବି ଭଲେ

ତା’ ଚରିତ ମୋ ଆଗେ ନ କହ ଗୋ (1)

ଏଥର ମିଶି ସହି ! ନ’ ଥର ସହି ସହି

ପଥର କରିଛି ଏ ଦେହ ଗୋ (2)

ମୃଦୁ ଗିରେ ମଣାଇଁ ବଳିଆଇ ଜଣାଇଁ

କ୍ରୋଧାନଳେ ମୋ ହୃଦ ନ ଦହ ଗୋ (3)

ରଚୁଥିଲେ ତା’ ପ୍ରୀତି ସେ ସୁଖ, ସେ ବିପତ୍ତି

ତୁହି ଭୋଗ କର, ତୁହି ସହ ଗୋ (4)

କେତେ ଯତନ କରି କଦନ - ନଦୀ ଚରି

ଅଛି ମୁଁ ବରଜି ମହାମୋହ ଗୋ (5)

ଅଛି କି ତାହା ଦତ୍ତ ନଖକ୍ଷତ ରହିତ

ଏ ନଗରେ ନାଗରୀ ନିବହ ଗୋ (6)

କଳା କିଶୋର ପ୍ରେମ ହିମାନିଠାରୁ ହିମ

ପ୍ରଳୟାନଳରୁ ଡହ ଡହ ଗୋ (7)

ଅଷ୍ଟଦୁର୍ଗେଶ ଭାଷେ ଶୁଣି ଲଳିତା ହସେ

କହିଲେ ମୋ ସଖୀ ଦୁଃଖୀ ନୁହ ଗୋ (8)

କବିସୂର୍ଯ୍ୟ ବଳଦେବ ରଥ