ଅନୀତି ମାଟିରେ ମିଶିଛି
ଅନୀତି ମାଟିରେ ମିଶିଛି
ମାଟିରେ ମିଶିଛି ରହିନାହିଁ କାର ଗର୍ବ
କୋଟିଏ ଆତ୍ମାରେ ଗୋଟିଏ ସ୍ପନ୍ଦନ
ତାହା ତ ଅଟେ ମାନବିକତା
ଶରୀର ବିଭିନ୍ନ, ଆତ୍ମା ଏକକ, ପାପ
ପ୍ରଭାବିତେ ହରାଏ ସମତା ।
ଶରୀରରୁ ଜୀବ ଗଲା ପରେ ଶବ
ଛ ଖଣ୍ଡ କାଠରେ ଜୁଇ ଜଳିବ
ହେ ମଣିଷ ମାଟିରେ ତୋହର ଜନ୍ମ ପୁଣି
ମାଟିରେ ଶରୀର ମିଶିଯିବ ।
ବୟସ ଚାଳିଶ ହେଲେ, ଅବତରଣ ପର୍ବ
ସେଇଠୁ ଆରମ୍ଭ ହୋଇବ
ଏଇ ଅଧା ରାସ୍ତାରୁ ଧିରେ ଧିରେ କ୍ଷୟ ପ୍ରାପ୍ତି
ପିଚ୍ଛିଳ ପଥର ସୋପାନ ଚାଲିବ ।
ଜାଣିନ କି ଦୁର୍ଯ୍ୟୋଧନ କୌରବଂକ ଶ୍ରେଷ୍ଠ
ଥିଲେ ହସ୍ତିନାର ଅଧୀଶ୍ୱର
ଶହେ ଭାଇଥିଲେ ଗରବ ଓ ମାନରେ ଅନ୍ଧ
ହୋଇଗଲେ, କି ବାର୍ତ୍ତା ସମାଜକୁ ତାର ।
ମାମୁଁ ଶକୁନିର ପ୍ରବଞ୍ଚକତାରେ ଘୃଣା ବିଷ
ପିଇ ଅନ୍ଯାୟକୁ କଲେ ସାଥୀ,
ରହିଲାକି ଚିହ୍ନ ବର୍ଣ୍ଣ ଥାଇ ଭୀଷ୍ମ, ଦ୍ରୋଣାଚାର୍ଯ୍ୟ,
କର୍ଣ୍ଣ ପରି କେତେ ମହାରଥୀ ।
ବଳ, କଉଶଳ ଯେତେ ଲଗାଇଲେ, ଅଧର୍ମ ପଥ
ଅନ୍ୟାୟରେ ବୁଡି ରହିଲେ ସେହିଁ,
ଏ ଭୂପୃଷ୍ଠରେ ତାର ରହିଲେକି କେହି ଶେଷ ବେଳେ
ପିଣ୍ଡରେ ଟିକେ ପାଣି ଦେବା ପାଇଁ ।
ମାଟିରୁ ଗଢା ଏ ଶରୀର, ମାଟିର ମହକ ମମତା
ଦେଇଛିରେ ଶିକ୍ଷା ସତ୍ୟ ଧର୍ମ ଏଠି ସ୍ୱର୍ଗ
ହେ ଛାର ମଣିଷ, ମତ୍ତ ହୁଅ ନାହିଁ ଅନ୍ୟାୟ ଅନୀତି
ମାଟିରେ ମିଶିଛି ରହିନାହିଁ କାର ଗର୍ବ ।
ମୋର ବୃତ୍ତି ଓକିଲାତି, ସର୍ବଦା ଏପରି ଭାବନା ମୁଁ
ମନରେ ରଖିଛି ଓ ରଖିବାକୁ ଆଶା କରିଛି
ହୁଅନ୍ତୁ ସେ ନ୍ୟାୟମୂର୍ତ୍ତି, ବଡ ଓକିଲ ଅବା ପ୍ରତିଷ୍ଠିତ
ଲୋକ, ଅଂଗୁର କୋଳି ଖଟାର ଆଖ୍ୟା ପାଇବି,
ମୁଁ ଭଲ ଭାବେ ଜାଣିଛି ।
ଦୁନିଆ ବୁକୁରୁ ବିଦାୟ ପୂର୍ବରୁ ଶେଷ ଅଳି ମୋହର
ରହିଥାଉ ମୋର ସଦା ଏହି ଭାବ
ମନରେ ନଆସୁ ଅନ୍ତରରେ ଇର୍ଷା ଅସୂୟା ଅନ୍ଯାୟ,
ଅନୀତି, ମୃତ୍ୟୁ ବେଳରେ ଦୁଃଖ ଲାଘବ ହେବ ।