କରୁଣାକର
କରୁଣାକର
କରୁଣା କର ହେ କରୁଣାକର
କଳପବଟିଆ କଳାପୀପର
କଳା ଭଅଁର
କମଳପ୍ରିୟା କମଳମୁହଁର |
କମନୀୟ ରୂପ ଅରୂପାନ୍ତର
କଜ୍ଜଳ ଜଳଦ ଜିଣି ସୁନ୍ଦର
କଞ୍ଜ ଅଧର
କଳିତ ଲଳିତ କୁସୁମାକର |
କଟକ ମର୍ତ୍ତ୍ୟବୈକୁଣ୍ଠେ ବିହର
କର ଦାନ ଚଉବର୍ଗ ସୁଖର
କର୍ତ୍ତା ବିଶ୍ୱର
କର ଯୋଡ଼ିଥାନ୍ତି ସଚରାଚର |
କମଳଯୋନି କମଳଶେଖର
କରମାଳୀ କରମାଳୀ ସାଗର
କଳା ଆକର
କରୀମାଥ,ଇନ୍ଦ୍ର ଯା ପରିଚର |
କରଜେ ଧାରଣ କର ଭୂଧର
କରଟ ଭୂଷଣ୍ଡେ ଜ୍ଞାନ ବିତର
କର୍ବୁର ପର
କରୀ ହରିଣୀ ଖଗ ଆର୍ତ୍ତ ହର |
କଳ୍ପଜୀବୀ ମାର୍କଣ୍ଡେୟ ଈଶ୍ୱର
କଳୁଷ ନାଶନ ଉଡ଼େ ଅମ୍ବର
କପି ଧ୍ଵଜର
କପଟୀ ସାରଥି କର ହୁନ୍ଦର |
କରୋନା ଡରେ ବିଶ୍ୱ ଥରହର
କରିଛ ଛଳନା ହେ ଚକ୍ରଧର
କର୍ତ୍ତନ କର
କରାଳ ମାରକ ବ୍ୟାଧି ସତ୍ୱର |
କଇଟଭ ମଧୁ ହିରଣାକ୍ଷର
କଂସ ରାବଣ ମୁରା ଦର୍ପ ହର
କରୁଣାକର
କରୋନା ଭୁତାଣୁ କେତେ ମାତର |
କଳ୍କୀ ଅବତାର କଳିଯୁଗର
କଳା ଧଳା ଅଶ୍ୱେ କୃପାଣ କର
କହେ ପାମର
କବି ଜଗନ୍ନାଥ ଧ୍ୟାୟୀ ପୟର |