ଚଉପଦୀ - ଆଉ କାହା କର ଧରିବି

କବି - ଉପେନ୍ଦ୍ର ଭଞ୍ଜ

ରାଗ -ଜୟଜୟନ୍ତୀ, ତାଳ- ଯତି

ଆଉ କାହା କର ଧରିବି । ସଜନି ଗୋ ।

ଛାଡ଼ିଗଲେ ଗୁଣମଣି ଝୁରି ଝୁରି ମରିବି । ଘୋଷା ।

ତୁ ମୋହର ମୁଁ ତୋର

ନ କରିବୁ ଅନ୍ତର ।

ମାରୁଅଛି ପଞ୍ଚଶର

ଦହୁଅଛି ଶରୀର । ୧ ।

ସୁନ୍ଦର ତୋ ଲଲାଟ

ପଡ଼ୁଅଛି ଆଲଟ ।

ଗଜଦନ୍ତ ପଲ୍ୟଙ୍କରେ

ଆଉ ନାହିଁ ତୋ ଭେଟ । ୨ ।

କୋକିଳ ପରି ବାଣୀ

କହୁ ଚତୁରୀମଣି ।

ଭ୍ରୂଲତା ଶୋଭା ତୋହର

ଇନ୍ଦ୍ରଧନୁକୁ ଜିଣି । ୩ ।

କି ସୁନ୍ଦର ଧନକୁ

ଚାହିଁ ତୋ ବଦନକୁ ।

ଯେତେ ଯେତେ ଦୋଷ କଲି

ନ ଘେନିବୁ ମନକୁ । ୪ ।

ରସବତୀ ରସିବ

କାନ୍ତ କୋଳେ ବସିବ ।

ଭଣେ ଉପଇନ୍ଦ୍ର ଭଞ୍ଜ

ଚାରି ଚକ୍ଷୁ ମିଶିବ । ୫ ।