ଚଉପଦୀ - ଆଜ ବ୍ରଜରାଜ ପୁରେ

କବି - ଗୋପାଳକୃଷ୍ଣ ପଟ୍ଟନାୟକ

ତାଳ ଝମ୍ପା, ରାଗ ମୋହନକଲ୍ୟାଣ

ଆଜ ବ୍ରଜରାଜ ପୁରେ

ଲାଜେ ମୁଁ ବୁଡ଼ିଲି ମା । ପଦ ।

ରୋହିଣୀଙ୍କ ସଙ୍ଗତରେ

ଥିଲି ରନ୍ଧନ ମନ୍ଦିରେ

ପଛକୁ ନାଗରବର

ଦୃଷ୍ଟି ପଡ଼ିଲି ମା । ୧ ।

ହୃଦ କରେ ଦମ ଦମ

ବୁଦ୍ଧି ମୋ ହୋଇଲା ବାମ

ସୁଧାସମ ଶିଖରିଣୀ

ଜଳେ ନିଉଡ଼ିଲି ମା । ୨ ।

କପଟିନୀ କୁନ୍ଦବଲ୍ଲୀ

ଜାଣି ପାଶୁ ଗଲା ଚଳି

ସାରୀ ପଢ଼ିବାରୁ ଆଣି

ଓଢ଼ଣି ଓଢ଼ିଲି ମା । ୩ ।

ହେଲା କି ପାକ ସମ୍ଭାର

ବୋଲି ପଚାରନ୍ତେ ମୋର

ଧୃତି ଖସିଗଲା ପ୍ରତି

ଉତ୍ତର ହୁଡ଼ିଲି ମା । ୪ ।

ମୋ ଓଷ୍ଠ କମ୍ପିଲା ଚାହିଁ

ହସିଲା ମୋ ଆଡ଼େ ରହି

ତା ଇଙ୍ଗିତ ହେଜି ଶୀଘ୍ରେ

ଅଧର ପୀଡ଼ିଲି ମା । ୫ ।

ଗୋପାଳକୃଷ୍ଣ କହିଲା

ରହୁ ଜଟିଳା ଅଇଲା

ଆସନ୍ତୁ ସଜନି ତୋତେ

କେତେ ମୁଁ ଲୋଡ଼ିଲି ମା । ୬ ।