ଚଉପଦୀ (154)

ଚଉପଦୀ

(154)

ରୁଷାକୁ ସାରସ ଦୃଶା ତ ଶିଖିଲା ରେ (ଘୋଷା)

ମୁଁ ସାହସୁଁ କେଉଁ ଦୋଷ କରିବା ଦେଖିଲା ରେ,

ତୁଷାର ମୟୁଖ ମୁଖ ମଣ୍ଡଳ ଶୁଖିଲା ରେ (1)

ନିଶାରୁ ମୁଁ ହୋଇଛି ଯେ ତା ସ୍ନେହ ଭୋଖିଲା ରେ,

ବିଶାରଦା କି କାଳେ ସୁଖ ଉପେକ୍ଷିଲା ରେ (2)

କୃଶାଙ୍ଗୀ କା ଶୁଣିଲା ତା ମନରେ ଲାଖିଲା ରେ

କୁଶାଳିରେ କେଉଁ ଖଳ କୁଶାନୁ ଯୋଖିଲା ରେ (3)

ସୁସାର ସରସାକ୍ଷର ଥରେ ନ ଭାଖିଲା ରେ

କି ସରସାତ୍ମଜ ଦୃଷ୍ଟ ଦଶାରେ ଲେଖିଲା ରେ (4)

ଭାଷେ ଜଗଦ୍ଦେବ ସ୍ନେହ ଆଉକି ରଖିଲା ରେ

ରସାଳସାଧର ମୋ ରସନା ନଚାଖିଲା ରେ (5)

କବିସୂର୍ଯ୍ୟ ବଳଦେବ ରଥ