ଚଉପଦୀ -୧୩ (ମୀନ ନୟନୀ)

ମୀନ ନୟନୀ, ପ୍ରେମ ତରଙ୍ଗିଣୀ ସହୀ

ଗୋକ୍ଷୀର ବରନା, ପ୍ରେମ ଧାରା ମନ୍ଦାକିନୀ,

ମୀନ ନୟନୀ ।

ମଧୁର ଲଳିତ କଥା, ହରି ନିଏ ମନୁ ବ୍ୟଥା

ହସରୁ ମୁକୁତା ଝରେ, ରତି ପତି ଶର ମାରେ

ତୋର ପ୍ରେମ ସୁଧା ଧାରେ

ତୁ ଚନ୍ଦ୍ରର ଚାନ୍ଦିନୀ, ମୀନ ନୟନୀ ।

ଭୁରୁ ଲତା ଇନ୍ଦ୍ର ଧନୁ, ତିଳ ପୁଷ୍ପ ନାଶା “ତନୁ-

ଲବଣୀ” ସମ କୋମଳ, କି ଅବା ତୁ ପଦ୍ମ ଦଳ

ଝରେ ଅବା ମକରନ୍ଦ

ଆରେ ବର ବରନୀ, ମୀନ ନୟନୀ ।

ଦିଶୁ ଲବଙ୍ଗ ଦୀପର, ସ୍ଵପ୍ନ କୁମାରୀ ପ୍ରକାର

କିଅବା ଅଳକା ପୁରୀ, ନୃତ୍ୟ ରତା ଅପସରୀ

ତୋ ରୂପ ଝଲସି ଯାଏ

ଝଲସେ ସୌଦାମିନୀ, ମୀନ ନୟନୀ ।

ପ୍ରଫୁଲ୍ଲ ଫୁଲେ କବରୀ, ବାନ୍ଧିଛୁ ରେ ସୁନା ଗୋରୀ

ଆଖି ଯାଏ ଲାଖି ଯଥା, ପ୍ରଣୟେ ପ୍ରୀତିର ଅଠା

ରସିକ ଶେଖର ମନ

ପ୍ରେମେ ନେଉ ଲୋ ଟାଣି, ମୀନ ନୟନୀ ।