ଚଳଚ୍ଚିତ୍ର

ଉଦାସ ମନକୁ ଲାଘବ ଆଶାରେ 

 ଦେଖୁ ଆମେ ଚଳଚ୍ଚିତ୍ର 

କଳାକାର ବନ୍ଧୁ ନିଖୁଣ ଚରିତ୍ର 

 ମନେ ଦିଏ କେତେ ଚିତ୍ର 

ସମାଜର ସୁଖ ଦୁଃଖ.....

ଲେଖକ ରଚନା ନିର୍ଦ୍ଦେଶକ କଳା

 ତୋଳେ ଅଭିନୟ ଭେକ ।୧ ।

ଚଳଚ୍ଚିତ୍ରର ସେ ପ୍ରତିଟି ଚରିତ୍ର 

 ଦେଖୁ ପରିବାର ମିଳି 

ବାପ ପୁଅ ମାଆ ଭଉଣୀ ସହିତ 

 ଏକତ୍ରରେ ସବୁ ମିଳି 

ଅଟେ ସେଇ ଚିତ୍ର କଳା....

ଭରପୁର ତହିଁ ବାର୍ତ୍ତା ରହିଥାଏ 

 ଗୁଣାତ୍ମକ ଚାରୁକଳା ।୨ ।

ଆଜିର ଦିନରେ ନାହିଁ ସେହି କଳା 

 କହିବାକୁ ଲାଗେ ଲାଜ 

ନଗ୍ନ ଆଭୂଷଣେ ଚାଲେ ଅଭିନୟ 

 ପରିବାରେ ଦିଏ ଲାଜ 

ସଂସ୍କୃତିର ଅବକ୍ଷୟ.....

ପାଶ୍ଚାତ୍ୟ ଭଙ୍ଗୀରେ ଚାଲେ ଅଭିନୟ 

 ଏହି ତାର ପରିଚୟ ।୩।

କଳାତ୍ମକ ଲେଖା ସଞ୍ଜମ ଭୂଷଣ

 ଶିକ୍ଷା ବାର୍ତ୍ତା ସମାଜକୁ

ରହିଥିଲେ ସିନା ଚଳଚ୍ଚିତ୍ର ଦେବ 

 ଆମୋଦ ଆମ ମନକୁ 

କଳାଟି ସଦା ସୁନ୍ଦର......

ପାଇବ ଆଦର ଚଳଚ୍ଚିତ୍ର ମାନ 

 ଥିଲେ ଆଦର୍ଶ ସଂସ୍କାର ।୪ ।