ଚିଠି

ଚିଠି ସିନା ସରେ ଲେଖିଦେଲେ ଇତି

ସରେ ନାହିଁ ଜମା ପ୍ରୀତି

ଅକୁହା କଥାକୁ କେମିତି ଲେଖିବି

ହଜିଯାଇଛି ମୋ ମତି।

ସଂକେତ ରେ କିଛି ଲେଖି ଅଛି ସଖି

ବୁଝି ଯିବ ସତ୍ୟା ସତ

ପାନ ଗୁଆ ଭାବି କିଛି ନ ବୁଝିଲେ

ଶୂନ ହେବ ଭବିଷ୍ୟତ ।

ଭାବନା ବହୁତ ଶବଦ ଅଳପ

ଲେଖିବା ସ୍ଥାନଟି ସାନ

ହୃଦୟ ପରଖି ଦେଖିଲେଗୋ ସଖି

ନ ହୋଇବ କେବେ ଶୂନ ।

ଭାବକୁ ପରଖି ସମୟ ନିରିଖି

ମିଠା, କଷା,ପିତା ଚାଖି

ଫୁଲର ମହକ ପ୍ରୀତିର ବାହକ

ଲେଖିଛି ଦିପଦ ସଖି ।

ଫଗୁଣର ରଂଗେ ରଞ୍ଜିତ କରିଛି

ପ୍ରେମ ଭରା କିଛି ଶବ୍ଦ

କୋଇଲିର ସ୍ୱରେ ପଢ଼ୁ ଥିବ ସଖି

ହୋଇବନି ଜମା ସ୍ତବ୍ଧ।

ମନର ବିହଙ୍ଗେ ପ୍ରେରଣ କରୁଛି

ପଢ଼ି ନେବ ଯଥା ଯଥ

ସଜ ବାଜ ହୋଇ ସଭିଙ୍କୁ ହସେଇ

ଜଗି ରହିଥିବ ପଥ ।