ଚିଠି ମୋତେ ଦେଉଥିବୁ

'ଆଶା' ନାମେ ଏକ ସଂକଳନ ମୋର

ପ୍ରକାଶିତ ହେଲା ଯେବେ ,

ଜିଲ୍ଲା ଶିକ୍ଷା ଅଧିକାରୀଙ୍କୁ ମୁଁ ତାହା 

ଦେଲି ଉପହାର ଭାବେ

ବାପାଙ୍କ ପାଖରୁ ବହିଟିକୁ ପାଇ

ହେଲେ ସିଏ ଭାରି ଖୁସି ,

ମୋ କୁଶଳ ପୁଛି-ଦେଖାକଲେ ଦିନେ

ଆମରି ଘରକୁ ଆସି

କହିଲେ-"ମାଆ ତୁ ଭଲ ଲେଖୁଅଛୁ

ନେବି ପାଠାଗାର ଲାଗି ,

ମୋଅରି ଚେଷ୍ଟାରେ ଏ ସୁନ୍ଦର ବହି

ପିଲାଙ୍କୁ ଯୋଗାଇ ଦେବି

ଲେଖିଚାଲୁ ଥା' ତୁ ନ ଅଟକି ଜମା

କରୁଣା କରିବେ ସାଇଁ ,

ବାପାଙ୍କୁ କହିଲେ-ଧନ୍ୟ ହୋଇଛନ୍ତି

ଏଇଭଳି ଝିଅ ପାଇ

କଥା ଦେଇ ଯେଣୁ ରଖିଥିଲେ ସିଏ

ଜଣାଇ ମୁଁ ଧନ୍ୟବାଦ ,

ଚିଠି ଲେଖିଥିଲି-ପଢ଼ି ସେ ଆନନ୍ଦେ

ହୋଇଥିଲେ ଗଦଗଦ

ପ୍ରତ୍ୟୁତ୍ତର ଭାବେ ଚିଟାଉ ଲେଖିଲେ

ଦେଇ ଆଞ୍ଜୁଳାଏ ସ୍ନେହ ,

ପ୍ରେରଣା ତହିଁରେ ଖୁନ୍ଦି ହୋଇଥିଲା

ବିଶାଳ ତାଙ୍କ ହୃଦୟ

ଆଶିଷ ଢାଳି ସେ ଉତ୍ସାହିତ କରି-

ଥିଲେ ମୋତେ ନାନା ଭାବେ ,

ଲେଖିଥିଲେ-" ମୋତେ ଚିଠି ଦେଉଥିବୁ

ଇଚ୍ଛା ହେବ ତୋର ଯେବେ

ସେଇଦିନ ଠାରୁ ସାଇତି ରଖିଛି

ତାଙ୍କ ଚିଠିଟିକୁ ମୁହିଁ ,

ଚଳଭାଷ ଯୋଗେ ଆଳାପ ବି କରେ 

ତାଙ୍କୁ ଜମା ଭୁଲିନାହିଁ