ଚିନ୍ମୟୀ
ଚିନ୍ମୟୀ
ହେମନ୍ତ ଆକାଶୁ ଝରେ ଜଳବିନ୍ଦୁ
ସ୍ୱଚ୍ଛ ମୁକୁତା ଶିଶିର,
ଗୋଧୂଳି ନଇଁଲେ ବହିଆସେ ଧିରେ
ମୃଦୁ ଶୀତଳ ସମୀର ।
ପ୍ରକୃତି ସଜାଏ କୁସୁମ ସମ୍ଭାର
ତୁମ ଆଗମନ ପାଇଁ,
ପୂର୍ଣ୍ଣକୁମ୍ଭ ସାଥେ ଦୀପମାଳା ଜଳେ
ସହାସ ସଧୀର ହୋଇ ।
କାର୍ତ୍ତିକ ର ଏଇ ଉଆଁସ ଅନ୍ଧାରେ
ଛାତି ଚିରି ନିଶାର୍ଦ୍ଧ ରେ,
ବିରାଜିତା ହୁଅ ମୃଣ୍ମୟ ମୂର୍ତ୍ତିରେ
ଭବ୍ୟ ପ୍ରାଣ ପ୍ରତିଷ୍ଠା ରେ ।
ଅଙ୍ଗେ ରୂପରାଗ ଝଲସି ଉଠୁଛି
ହିରଣ୍ମୟୀ ଦିବ୍ୟ ଆଭା,
ଘଣ୍ଟ,ଝାଞ୍ଜ,ଢୋଲ ବାଦ୍ୟେପ୍ରକମ୍ପିତ
ଗ୍ରାମରୁ ସହର ଶୋଭା ।
ଜୟ ମହାକାଳୀ ଜୟ ମହାଲକ୍ଷ୍ମୀ
ମହା ସରସ୍ଵତୀ ରୂପେ,
ଆସ ତ୍ରିନୟନା କାଳିକା,ଚିନ୍ମୟୀ
ବରଦ ମୁଦ୍ରାରେ ଭବେ ।
ଉତ୍କଣ୍ଠିତ ମନେ ସନ୍ତୁଷ୍ଟ ନୟନେ
ଚାହିଁଅଛୁ ତୁମ ପଥ,
ବେନିକର ଯୋଡି କରୁଛୁ ଦୟିନୀ
ଗୁହାରି ଶୁଣଗୋ ମାତ ।
ଅନ୍ୟାୟ, ଅନୀତି ଆତଙ୍କ,ଆଶଙ୍କା
ସନ୍ତ୍ରସ ଏ ଜୀବନ ର,
ରାଗ,ଦ୍ଵେଷ,ହିଂସା ଅହଙ୍କାର,ଈର୍ଷା
ତମସା କୁ ଦୂର କର ।
ବିବେକ, ଆଲୋକ ପ୍ରଜ୍ବଳିତ କର
ଢାଳି ଆଶିଷ ର ବାରି,
ପ୍ରତିଟି ଅନ୍ତରେ ମାନବତା ଜାଗୁ
ମନ୍ଦାକିନୀ ଆସୁ ଝରି ।