ଛନ୍ଦା ଚରଣେ

ଛନ୍ଦା ଚରଣରେ ବନ୍ଧା ଏ ପରାଣ

ଭାବ ଭକତି ର ଡୋରେ ,

ରହିଥାଉ ପ୍ରଭୁ କରହେ ଆଶିଷ

ଅକିଞ୍ଚନ ମୁଣ୍ଡ ପରେ ।

ଧରା ଧାମେ ମୋତେ ପଠାଇଛ ମାନେ

ଫେରିବା ନିଶ୍ଚିତ ଥୟ ,

ବାହୁଡ଼ା ସମୟ ହେଲାଣି ଆସନ୍ନ

ସେଥିପାଇଁ ନାହିଁ ଭୟ ।

ଚିନ୍ତା ଜାଗେ ମନେ ଯେ'ପାଇଁ ପଠାଇ

ଥିଲ ମୋତେ ମର୍ତ୍ତ୍ୟଧାମେ ,

କେତେ ସଫଳତା ପାଇଲି ଜୀବନେ

ଜାଣିଅଛ ଏକା ତୁମେ ।

ନିଜ ଜାଣିବାରେ କର୍ତ୍ତବ୍ୟ ରେ ହେଳା

କେବେ କରିନାହିଁ ମୁହିଁ ,

ଭୁଲ୍ ଯେବେ କିଛି କରିଅଛି ପ୍ରଭୁ

କ୍ଷମାକର ଭାବଗ୍ରାହୀ ।

ସୁଖ ଆଶା କେବେ କରିନି ଜୀବନେ

ଅଜାଡ଼ି ଦେଇଛ ପ୍ରଭୁ ,

ଏକମାତ୍ର ଆଶା ମୋର ଏହି ଆତ୍ମା

ଶ୍ରୀଚରଣେ ସ୍ଥାନ ଲଭୁ ।