ଚାଷୀ ଭାଇ
ଚାଷୀ ଭାଇ
ଚାଷୀ ଭାଇ
ପାହି ନାହିଁ ରାତି ରାବି ନାହିଁ କାଉ
ସିନ୍ଦୂରା ଫାଟିବା ଦେଖି
ଶେଯ ଛାଡି ଉଠି ବିଲକୁ ବାହାରେ
ଚାଷୀ ଧରି ଚଷାମୁଠି ।
କାଳିଆ କଷରା ବଳଦ ଯୋଡିକୁ
ଯୋଚଇ ଜୁଆଳି ଥୋଇ
ଲଙ୍ଗଳ ଝୁଲାଇ ପାଞ୍ଚଣ ହଲାଇ
ବେଗେ ଚଳେ ଚଷା ଭାଇ ।
ଛାନ୍ଦ ଚଉପଦୀ ରାଗ ରାଗିଣୀରେ
କଣ୍ଠୁ ଝରେ ମଧୁ ରସ
ଖରା ଓ ବରଷା ଶୀତ କାକରକୁ
ତିଳେ କରେ ନାହିଁ ତ୍ରାସ ।
ଖରାଟିଆ ଚାଷ ବରଷା ଝଡିରେ
ରୁଆ ବଛା ବେଉଷଣ
କାଲୁଆ ଜାଡରେ ଖେତଖଳା ଜଗା
ବରଷକ ଯାକ କାମ ।
ଅବିରାମ ତାର ଶ୍ରମ ଓ ସାଧନା
ସୁନ୍ଦର ଶ୍ୟାମ ଲଗନେ
ସୁନା ଫସଲରେ ହସିଉଠେ ବିଲ
ଦୋଳଇ ଧିର ପବନେ ।
କ୍ଷେତ ଓ ଖଳାରେ କୃଷକ ଗୃହିଣୀ
ଛାଇ ପରି ଥାଏ ପଛେ
ଅମଳ ଫସଲ ସାଇଥିବା ପାଇଁ
ଘରଦ୍ୱାର ଲିପେପୋଛେ ।
ଶୁଦ୍ଧ ପୂତ ହୋଇ ଝୋଟିଚିତା ଆଙ୍କେ
ପ୍ରତି ଗୁରୁବାର ଦିନ
ଖଟୁଲି ଉପରେ ଲକ୍ଷ୍ମୀ ଠାକୁରାଣୀ
ପୂଜେ ଧାନ ସେର ମାଣ ।
କୃଷି ଓ କୃଷକ ଦେଶର ସମ୍ବଳ
ଜୀବନ ଶକ୍ତି ଆଧାର
ଉତ୍ଥାନେ ତାହାର ଜାତୀୟ ଉନ୍ନତି
ପତନେ ପ୍ରଳୟ ଘୋର ।