ଚାରିଚକ୍ଷୁ ମିଳନ

ଚାରିଚକ୍ଷୁ ହୋଇଯାଏ ଯେବେ ବି ମିଳନ

ଜାଗେ ମନେ ଆକର୍ଷଣ ପୁଲକେ ପରାଣ ।

ଜାତ ହୁଏ ହୃଦୟରେ ଭାବ ଅନୁରାଗ 

ଝଲସି ଦିଶେ ଆଖିରେ ଇନ୍ଦ୍ରଚାପ ରଙ୍ଗ ।

ଅବ୍ୟକ୍ତ ଆଖିର ଭାଷା ପ୍ରକାଶେ ସ୍ବଭାବ

ପ୍ରସ୍ଫୁଟେ ସୁମନ ପୁଷ୍ପ ସୁଗନ୍ଧେ ଅପୂର୍ବ ।

ପ୍ରକଟେ ପଟଳ ମନ ହୃଦ ସୁନ୍ଦରତା

କେବେ ମେଘ ମହ୍ଲାରରେ ଓଦା ଆଖିପତା ।

ଏକାନ୍ତରେ ଚାରି ଚକ୍ଷୁ ହେଲେ ଏକାକାର

ରହେ ନାହିଁ ସଂଗୋପିତ କଥା ଅନ୍ତରର ।

ଚାରି ଚକ୍ଷୁ ମିଶିଗଲେ ଉଚ୍ଚାଟଇ ମନ

କଣ୍ଠେ ଶୁଭେ ଗୁଣୁ ଗୁଣୁ ଗୀତର ଗୁଞ୍ଜନ ।

ଲାଗେ ସତେ କରିଦେଲା କିଏ ବା କିମିଆ 

ଝୁରେ ମନ ସାଥି ବିନା ଲାଗେ ଏକୁଟିଆ ।

ଖୋଜେ ସଙ୍ଗ ଅନ୍ତରଙ୍ଗ ନିରୀହ ଚାହାଣୀ

ଆଖିରେ ଉକୁଟେ ପ୍ରେମ ନିଏ ମନ କିଣି ।

ଲଜ୍ଜାଭରେ ଯେବେ ମଥା ହୁଏ ଅବନତ

କହେ ଆଖି ନିଃଶବ୍ଦରେ ହୃଦ ସହମତ । ।

       -----