ବ୍ୟଥାଭରା ଅନ୍ତଃସ୍ୱର

ଚେନାଏ ହସରେ କିଣିନେଲ ମନ

କରିନେଲି ଆପଣାର

ହୃଦୟ ଭିତରେ ଆବଦ୍ଧ କରିଲି

ସ୍ମୃତି ଆମ ସମ୍ପର୍କର ।

ଆଞ୍ଜୁଳା ଆଞ୍ଜୁଳା ସପନ ବୁଣିଲି

ମନ ଅଗଣାରେ ମୋର

ବିଶ୍ୱାସ ଭରସା ପଣତେ ବାନ୍ଧିଲି

ସତେ ଧନ ଜୀବନର ।

ବେଳାଭୂମି ପରେ ନିଜେ ହସ୍ତେ ଗଢି

ପ୍ରେମଭରା ବାଲିଘର

ତୁମ ପ୍ରତୀକ୍ଷାରେ ଚାହିଁ ରହିଥିଲି

ଦେବି ବୋଲି ଉପହାର ।

ସକାଳ ବିତିଲା ସଞ୍ଜ ବି ବିତିଲା

ରାତ୍ରି କାଟି ଉଜାଗର

ତୁମେ କିନ୍ତୁ ସାଥି ବୁଝିପାରିଲନି

ଭାବାବେଗ ହୃଦୟର ।

ଦଗ୍ଧ ପରାଣର ଜ୍ବଳନ ଭରିଲ

 ବ୍ୟଥାଭରା ଅନ୍ତଃସ୍ବର

ନିତି ନୀରବରେ ଗଣ୍ଡସ୍ଥଳ ଛୁଏଁ

ଆଖି ଡେଇଁ ଅଶ୍ରୁଧାର ।