ବଉଳାର ଉପାଖ୍ୟାନ
ବଉଳାର ଉପାଖ୍ୟାନ
ଦ୍ୱାପର ଯୁଗର କିମ୍ବଦନ୍ତୀ କଥା
"ବଉଳାର ଉପାଖ୍ୟାନ",
ବାଲ୍ୟ କାଳେ ଜେଜେମାଆ ଠାରୁ ଶୁଣି
ଭଳି ଯାଇଥିଲା ମନ । [୧]
କାଞ୍ଚି ରାଇଜର ବିରଂଚି ପୁରରେ
ବଣିକସେ ଧନେଶ୍ୱର ,
ଗାଈଟିଏ ପୋଷି ରଖିଥିଲେ ପାଶେ
ବଉଳା ନାମଟି ତାର । [୨]
କଅଁଳା ଛୁଆକୁ ଘରେ ଛାଡି ଦିନେ
କାନନେ ଆହାର ପାଇଁ ,
ତୃଣ ଖାଇ ଫେରୁ ଫେରୁ ପଡିଥିଲା
ବ୍ୟାଘ୍ରର ହାବୁଡେ ଯାଇ । [୩]
"ବୃଦ୍ଧ ବୟସରେ ଶିକାର ପାଉନି
ସାତଦିନ ଉପବାସ,
ପିଣ୍ଡ-ପ୍ରାଣ ରକ୍ଷା ହୋଇଯିବ ଏବେ
ତତେ ମୁ କରିବି ଗ୍ରାସ"। [୪]
ବିକଳେ କହିଲା ଗୋମାତା," ମୋହର
ଚାରି ଦିନର ନନ୍ଦନ,
ଦୁଗ୍ଧ ଦେଇ ତାକୁ ଫେରି ମୁଁ ଆସିବି
ଘେନା କର ମୋ ବଚନ"। [୫]
"ହସି କହେ ବ୍ୟାଘ୍ର, "ଭଣ୍ଡୁଅଛୁ ମତେ
ଫେରିବୁ ଘରକୁ ଯାଇ,
ମରଣଠୁ ଧାଇଁ, ମରଣ ପାଖକୁ
ଶିକାରକି ଫେରିଥାଇ" ? [୬]
"ତ୍ରିବାର ଶପଥ କରି ସତ୍ୟ ରକ୍ଷା
କରି ନପାରିଲେ ମୁହିଁ ,
ଘୋର ପାପ ବଳେ କୁମ୍ଭୀପାକ ନର୍କ-
କୁଣ୍ଡରେ ପଡିବି ଯାଇ" । [୭]
ଶୁଣି ବଉଳାର ନିରୀହ ମୁହଁରୁ
ସତ୍ୟର ଗୁରୁ ବଚନ,
ବିଶ୍ୱାସର ବଶ ହୋଇ ବ୍ୟାଘ୍ର କହେ
"ଯାଇ ଫେରିଆ ବହନ"। [୮]
ଵାଳ ମୁଖେ ସତ ଚୁମ୍ବନ ଦେଇ
ପାନ କରାଇ ଗୋରସ,
ସନ୍ତାପିତ ପ୍ରାଣେ ଲୁହ ଢାଳି ଢାଳି
ଆପଣାକୁ କଲା ବାସ। [୯]
"ରଂକୁଣି ନିଧି ମୋ ଜୀବନର ଧନ
ଧର୍ଯ୍ୟହରା ହେବୁ ନାହିଁ,
ତୁମ୍ଭ ପାଦେ ଅଳି ସଂଖାଳିକୁ ସାହା
ହେଉଥିବ ଭାବଗ୍ରାହୀ"। [୧୦]
ସତ୍ୟ ପାଳି ସୂର୍ଯ୍ୟ ଚନ୍ଦ୍ର ଆତଯାତ
ସିନ୍ଧୁ ଲଙ୍ଘେ ନାହିଁ ତୀର ,
ସତ୍ୟ ରକ୍ଷା କରି ବଉଳା ହୋଇଲା
ବ୍ୟାଘ୍ର ସମ୍ମୁଖେ ହାଜ଼ର । [୧୧]
ଦେବରାଜଙ୍କର ଆସନ ଟଳିଲା,
ସତ୍ୟ ଜାଣି ଭାବଗ୍ରାହୀ,
ବ୍ୟାଘ୍ର ହୃଦେ ରହି କରୁଣାର ଭାଷା
ତା ମୁଖେ ଦେଲେ କୁହାଇ। [୧୨]
"ଧନ୍ୟଲୋ ବଉଳା! ତୋର ଆଦରଶ
ରହିଥିବ ଜନ୍ମ ଜନ୍ମ,
ସତ୍ୟ ପାଳି ପ୍ରାଣ ଦାନ ପାଇଗଲୁ,
ସୁଖରେ କଟୁ ତୋ ଦିନ"। [୧୩]
ପଶୁଟିଏ ଯଦି ସତ୍ୟ ରକ୍ଷା ପାଇଁ
ଜୀବନ ଚାହିଁଲା ନାହିଁ ,
କ୍ଷୁଦ୍ର ଆଶା ପୂର୍ତ୍ତି ପାଇଁ ନର କିମ୍ପା
ଅସତ୍ୟକୁ ଡରେ ନାହିଁ? [୧୪]