ବଉଳା
ବଉଳା
ସତ୍ୟକୁ ଅକ୍ଷର ଅକ୍ଷର ପାଳି
ବଞ୍ଚିବାକୁ ଚାହୁଁଛି ବଉଳା ।
ବିଚରା ଗାଈ ହେଉ କି ମଣିଷ
ଗପ ହେଉ ବା ସତ,
ଘନଘୋର ଜଙ୍ଗଲ ଭିତରେ ଜୀଇବା ଦୁଷ୍କର
ସବୁବେଳେ ହିଂସ୍ର ପଶୁ ଭୟ,
ତଥାପି ବଞ୍ଚିବାକୁ ରାହାଟିକେ ସାହାଟିକେ
ଖୋଜୁଛି ଜୀବନ
ସତ୍ୟ ଧର୍ମ ଲଭୁଛି ବିଜୟ ।
ସହଜ ସରଳ ଆଉ ମୁକ୍ତ ସେତେ ବେଶୀ ନୁହଁ
ଘରଖୁଣ୍ଟ ସ୍ୱଚ୍ଛନ୍ଦତା ପାଣି ଓ ପବନ,
ମଣିଷ ବି କମ୍ ନୁହେଁ ଏଠି ଭୟଙ୍କର,
ମନ ତା ଜଙ୍ଗଲ ଘନ ପଙ୍କ ଦଳ ପରିପୂର୍ଣ୍ଣ
ସରୋବର ଅବ୍ୟାପାର ଲୋଭ ମୋହ
କପଟତା ସ୍ୱ।ର୍ଥ ।
କେଉଁଠି ଗଦର୍ଭ କରେ ଚାରିବେଦ ପାଠ
କେଉଁଠି ବା ବ୍ୟାଘ୍ର ବୃଦ୍ଧ ସାଧୁବେଶେ
ପ୍ରଦର୍ଶୁଛି କଙ୍କଣ ସୁବର୍ଣ୍ଣ,
ଗ୍ରାମ ପୁର ପରିବାରେ ହୁଙ୍କାରନ୍ତି
କ୍ଷୁଧିତ ଶାର୍ଦ୍ଦୂଳ
ବଞ୍ଚିବାଟା ଭାରି ଦୁର୍ବିସହ ।
ସନ୍ତାପିତ ବଉଳା ବହୁତ,
କେଉଁ ଘାଟେ ନିରାପଦେ ମେଣ୍ଟିବ ତା ଶୋଷ,
ଭେଟଭୋଟେ ହସିବ ସୁନା ସଂସାର
ପୂରିବ ତା ଚାଖଣ୍ଡକ ପେଟ,
ସତରଖି ସ୍ୱଚ୍ଛନ୍ଦେ ପାରିବ ଜୀଇଁ
ସତ୍ୟ ପଥ ହୋଇବ ଉନ୍ମୁକ୍ତ ??
-------