ବୁଝାମଣା
ବୁଝାମଣା
ବୁଝିଗଲେ କଥା ମାନିଯାଏ ମନ
ହୋଇଯାଏ ବୁଝାମଣା
ହେଲେ ଅମାନିଆ ବଢ଼ଇ ଶତ୍ରୁତା
କଳି କାଢେ ବୁଝାବଣା ।
ପରସ୍ପର ସ୍ୱାର୍ଥ ଚିନ୍ତାକରି ହିତ
ଆଲୋଚନା ଶ୍ରେୟସ୍କର
ମଧ୍ୟସ୍ଥ ବିଚାର ଉପସ୍ଥିତି କିଛି
ଉପୁଯାଏ ସୁନିଷ୍କର୍ଷ ।
ଗ୍ରାମବାସୀ ପ୍ରାୟ ଡାକି ଭଦ୍ରଲୋକ
ଗୁହାରନ୍ତି ଅଭିଯୋଗ
ବସି ଗ୍ରାମସଭା ପଞ୍ଚୁଆତି ଚାଲେ
ତ୍ୱରିତେ ମିଳଇ ନ୍ୟାୟ ।
ଜଟିଳ ପ୍ରକ୍ରିୟା ନ୍ୟାୟିକ ବ୍ୟବସ୍ଥା
ହୋଇଥାଏ ବିଳମ୍ବିତ
ମରିହଜି ଯାନ୍ତି ମୁଦାଲା ମୁଦେଇ
ହୁଏନି କାହାର ହିତ ।
ବେଢିର ଉପରେ କୋରଡାର ମାଡ଼
ସହିଥାଏ ମହକିଲ
ନ୍ୟାୟର ନାମରେ ଚାଲେ ଅବ୍ୟାପାର
ଶୋଷଇ ଅର୍ଥ ଓକିଲ ।
ଉଚ୍ଚାସନ ମାଡି ବସିଥାନ୍ତି ଜ୍ଞାନୀ
ଆମର ବିଚାରପତି
ଧନମାନ ହାନି ଗାଳି ମାଡ ସହି
ଲାଗଇ ଦୁଖଃ କାକୁତି ।
ଲାଗେ ଅପହଞ୍ଚ ପରିଣାମହୀନ
ଦୁରୂହ ବ୍ୟୟବହୁଳ
ଦିଶେ ଭାରି ନାଲି ବୁଝାବଣା କଳା
ମହାକାଳ ଗଛ ଫଳ ।
ସମ୍ମାନର ଯୋଗ୍ୟ ସାଧୁ ଓ ସଜ୍ଜନ
ତା ହିତ ସାଧନ ଲକ୍ଷ୍ୟ
ହେଉ ପରିପୂର୍ତ୍ତି ସମ୍ମତ୍ତିରେ ତାର
ହିତକର ହେଉ ରାୟ ।