ବସୁଧୈବ କୁଟୁମ୍ବକମ୍

ଯୋଗୀ ମୁନି ଙ୍କର ଦେଶ ମୋ ଭାରତ 

ସଂସ୍କୃତି ତାର ମହାନ,

ସବୁ ମାନବଙ୍କୁ ଏହି ବସୁଧାରେ 

କରେ କୁଟୁମ୍ବର ଜ୍ଞାନ l

ସାରା ବିଶ୍ୱରେ ସାମ୍ୟର ବାଣୀକୁ 

ପ୍ରଚାରପ୍ରସାର କରେ 

ବିବେକାନନ୍ଦ ସେ କହିଥିଲେ ଦିନେ

ଯାଇ ଚିକାଗୋ ସହରେ ll

ସାରା ବସୁଧା ଟି କୁଟୁମ୍ବ ସମାନ

ସଭିଏଁ ଭଉଣୀ ଭାଇ,

ଏକା ଆତ୍ମା ସର୍ବ ଘଟେ ବିରାଜିତ

ଭିନ୍ନଭିନ୍ନ କିଛି ନାହିଁ l

ଜାତି ଧର୍ମ ଗୋତ୍ର ଭିନ୍ନ ହୋଇଲେବି

ଏକା ରକ୍ତ ସର୍ବ ଦେହେ,

ଆବଶ୍ୟକ ହେଲେ ସେଇ ରକ୍ତ ଦିନେ

ଜୀବନ ବଞ୍ଚାଇ ଥାଏ l

ଯୁଦ୍ଧ ଘନ ଘଟା ଦିଅରେ ଦୂରେଇ 

ଶାନ୍ତି ର ମାର୍ଗ କୁ ଧର,

ସ୍ନେହ ଓ ପ୍ରେମରେ ସଭିଏଁ ରହିଲେ

ଉନ୍ନତି ହେବ ବିଶ୍ୱର l

ଭାରତ ଆମର ବିଶ୍ଵଗୁରୁ ସାଜି

ବିଶ୍ୱରେ ପ୍ରଚରେ ଯାଇ,

ଛାଡି ତୁଚ୍ଛା ଅହଂଭାବ ବଡ଼ିମାକୁ 

ଚଳିବାରେ ସାଥ ହୋଇ l

ଶାନ୍ତିସହାବସ୍ଥାନ କରିଲେ ସରବେ 

ଭାତୃ ଭାବ ହୃଦେ ବହି,

ପ୍ରାକୃତିକ କଷ୍ଟ ଅବା ଆତଙ୍କରେ 

ଯୁଝିବା ହାତ ମିଶାଇ ll

ସାରା ବିଶ୍ୱ ଏକ ପରିବାର ହେଲେ

ହୋଇବ କେତେ ଉନ୍ନତି,

ଶିକ୍ଷା ହେଉଅବା ଗବେଷଣା ହେଉ

ବଢିବ ସର୍ବତ୍ର ଖ୍ୟାତି l