ବସନ୍ତ ପଞ୍ଚମୀ

ଶୁକଳ ପଞ୍ଚମୀ ଆଜି ମାଘମାସ ପୂଣ୍ୟ ଅବସର ବାସରେ

ମନ୍ଦ ମନ୍ଦ ଗନ୍ଧବହ ଲହରଇ ପ୍ରକୃତି ଅପୂର୍ବ ଚିତ୍ରରେ

ଧରାକୁ,  ବର୍ଣ୍ଣାଳି ବରଣ ବିଭାରେ

ବିଚିତ୍ର ବର୍ଣ୍ଣରେ ସୁସଜ୍ଜିତ କରି ସ୍ଵାଗତେ ବନ୍ଦନା ଛଳରେ, ଧରାକୁ ।

 

ଶୁଭ୍ର ମଣିମୟ ରତ୍ନ ସିଂହାସନେ ଶ୍ଵେତ ଅରବିନ୍ଦ ଆସନେ

ବ୍ରହ୍ମ ଲୋକୁ ଆସି ମର୍ତ୍ତ୍ୟେ ବୀଣାପାଣି ଶୁଭ୍ର ରାଜହଂସ ସ୍ୟନ୍ଦନେ

ବିଜୟ,ଭୃଙ୍ଗଚୟ ବୀଣା ଵାଦନେ

ବକୁଳ ମଣ୍ଡିତ ଚୁତ ଡାଳେ ପିକ ଗାଉଛି ସଂଗୀତ ପଞ୍ଚମେ,ବିଜୟ ।

 

ଅଂଶୁମାଳି କର ଯାମିନି ନିକର ଚିରି ଯେହ୍ନେ ହୁଏ ଉଦୟ

ତେମନ୍ତେ ଅଜ୍ଞାନ ତିମିର ବିନାଶି ଆସନ୍ତି ହୋଇଣ ସଦୟ

ବରଦ,  ‌ହସ୍ତ ପ୍ରସାରିଣ ଅଭୟ

ପ୍ରଦାନ କରନ୍ତି ଜ୍ଞାନର ଆଲୋକେ ଧରା କରିଣ ପୂଣ୍ୟମୟ,ବରଦ ।