ବସନ୍ତ ଆସିଛି
ବସନ୍ତ ଆସିଛି
ବସନ୍ତ ଆସିଛି ଏ ଧରା ଧାମକୁ
ମଳୟ ପବନ ନେଇ
ସବୁରି ମନରେ ନବ ଉନ୍ମାଦନା
ଆନନ୍ଦର ସୀମାନାହିଁ |
ଋତୁରାଜାଗମେ ପ୍ରକୃତି ରାଣୀର
ନବ ଯଉବନା ବେଶ
ନବ ପଲ୍ଲବରେ ପଲ୍ଲବିତ ବୃକ୍ଷେ
ହସେ ଗିରିବନଦେଶ |
ଆମ୍ର କୁଞ୍ଜବନ ବଉଳ ବାସରେ
ହୁଏ ଦେଖ ମହକିତ
ମୁଖରିତ କରେ କୋଇଲି କଣ୍ଠର
ସୁଲଳିତ ମଧୁଗୀତ |
ରାଜରାସ୍ତା ଧାରେ କୃଷ୍ଣଚୂଡା ବୃକ୍ଷ
ନାଲି ରଙ୍ଗ ଓଢଣୀରେ
ଦିଶୁଅଛି ଦେଖ କେଡେ ମନୋହର
ପଥିକର ମନୋହରେ |
ପଳାସ ବୃକ୍ଷରେ ଶୋଭା ପାଉଅଛି
ଦେଖରେ ପଳାସ ଫୁଲ
ଭ୍ରମର ତାହାକୁ ଚୂମେନାହିଁ ସିନା
ମନକୁ କରେ ପ୍ରଫୁଲ୍ଲ |
ସର୍ବ ବୃକ୍ଷରାଜି ନବ ପଲ୍ଲବିତ
ଧରେ କ୍ରମେ ଫୁଲ ଫଳ
ପଣସର କଠା କଞ୍ଚା ଆମ୍ବ ଖଟା
ଆତ୍ମାକୁ କରେ ପ୍ରଫୁଲ୍ଲ |
ଫଗୁଣ ମାସର କୃଷ୍ଣ ଚତୁର୍ଦ୍ଦଶୀ
ତିଥିରେ ଉପାସ ରହି
ସଦାଶିବ ପୂଜି ଜାଗର ଜାଳିଲେ
ଶିବକୃପା ମିଳୁଥାଇ |
ଫଗୁଣ ମାସର ପୂର୍ଣ୍ଣମୀ ତିଥିରେ
ପାଳିବା ଦୋଳଯାତରା
ଦୋଳ ବିମାନରେ ଦୋଳ ଗୋବିନ୍ଦଙ୍କୁ
ଦେଖି ହେବା ଆତ୍ମହରା |
ଅନ୍ୟ ଦେହେ ବୋଳି ରଙ୍ଗର ଅବିର
ଫଗୁଣର ଫଗୁ ବୋଳି
ପରକୁ ଆପଣା କରିନେବା ଆମେ
ଶତ୍ରୁ ମିତ୍ର ଯିବା ଭୁଲି |
ବିଶ୍ବ ଆକାଶରେ ଦେଖାଦେଇଥିବା
ଯୁଦ୍ଧର କଳା ବାଦଲ
ହଟାଇବା ଆମେ ତେଜି ଅହଂଭାବ
ବଜାଇ ଶାନ୍ତିର ଢୋଲ |
ଚଇତ ଆସିବ ନେଇ ଚଇତାଳି
କରି ସର୍ବେ ଆହ୍ଲାଦିତ
ମାଆ ମଙ୍ଗଳାଙ୍କୁ ଆରାଧନା କରି
ହେବା ଆମେ ଶାନ୍ତି ଦୂତ |
ମାଆ ମଙ୍ଗଳାଲୋ ତୋ ଚରଣେ ମୁହିଁ
ମଥାପାତି ମନାସଇ
ମଣିଷ ମନରୁ ଯୁଦ୍ଧଖୋର ଭାବ
ଦୂର କରି ଦେ ମା ତୁହି |
ସାରା ପୃଥିବୀର ସକଳ ପ୍ରାଣର
ପ୍ରତିଟି ତନ୍ତ୍ରୀରେ ଉଠୁ
ମଣିଷର ପ୍ରତି ସ୍ନେହ ଭକ୍ତିଭାବ
ବିଶ୍ବଭ୍ରାତୃଭାବ ସେଠୁ |
ଯୁଦ୍ଧଲାଗି ଯେତେ ମେଣ୍ଟ ଗଠନରୁ
ନିବୃତ ବିଶ୍ବର ଜନ
ଶାନ୍ତି ପ୍ରଗତିର ଧ୍ବଜା ଉଡାଇବ
ବନ୍ଧୁ କରି ଆଲିଙ୍ଗନ |