ବର୍ଷାରାଣୀ

ଭିଜା ଭିଜା ଶ୍ରାବଣେ ଭୂଇଁ

ଦିଏ ଖୁସି ମନରେ ଛୁଇଁ 

ଆସିଅଛି ବରଷା ରାଣୀ

ଲେଖେ ଚାଷୀ ନୂଆ କାହାଣୀ ।

ଦିନ ରାତ୍ର ବିଲରେ ଅଛି

ଚାଷ କାର୍ଯ୍ୟ ଯତ୍ନେ କରୁଛି 

ମାଟି ସଙ୍ଗେ ମାଟି ହେଉଛି

ବରଷା ରାଣୀ ଖୁସି ଆଣିଛି ।

କରୁଛି କେତେ କଷ୍ଟ ଚାଷୀ 

ରିମ୍ ଝିମ୍ ବର୍ଷରେ ଖୁସି 

ଜନ ଜନ ପେଟ ପୋଷୁଛି

ଅନ୍ନ କଷ୍ଟ ଦେଶେ ନହୁଛି ।

ଘଡ଼ଘଡ଼ି  ଶବ୍ଦ  ଗୁଞ୍ଜୁଛି 

ଝଙ୍କାର ଝିଙ୍କାରି କରୁଛି

ଶ୍ରାବଣ ମାସ ଏ ବର୍ଷାର

ବିଜୁଳି ମାରୁଛି ପ୍ରଖର ।

ବର୍ଷାରାଣୀ କରେ କାତର

ଭାଙ୍ଗିଦିଏ ସେ ଘରଦ୍ବାର

ଯନ୍ତ୍ରଣା ଦିଏ ବର୍ଷାରାଣୀ

ଦିଏ ମନୁଷ୍ୟେ ଚିନ୍ତା ଆଣି ।

ବର୍ଷା ବହୁଳେ ସୃଷ୍ଟି ନାଶ

ବର୍ଷା ବିହୁନେ ସର୍ବନାଶ

ଚାରିଆଡେ଼ ହିଁ ପାଣିପାଣି 

ନଦୀ ନାଳ ବଢୁଛି ପୁଣି ।

ଧାନ ଗଛ ବିଲେ ଶୋଭୁଛି 

ତହିଁ ଚାଷୀ ଖୁସିରେ ଅଛି

ଗଛ ପତ୍ର ଲତା ସୁନ୍ଦର

ନିଏ ମନ ମୋହି କବିର ।

କୋଇଲି ରାବ କି ମଧୁର

ମୟୁର ନାଚେ ନିରନ୍ତର

ପୁଷ୍ପର ଗନ୍ଧ ମନୋହର

ଅମ୍ଳଜାନ ହେ ନୀରୋଗର ।

ଆସିଛି ପରା ବର୍ଷାରାଣୀ

ବର୍ଷା ଋତୁର ଏ କାହାଣୀ ।