ବର୍ଷାରାଣୀ

ବରଷାରାଣୀ ତା ଆଖିରେ ପାଣି

କାନ୍ଦି କହେ ସେ ଦୁଃଖ କାହାଣୀ !

ଭାରି ଅଭିମାନୀ ରାଜନନ୍ଦିନୀ

ଦୁଃଖରେ ଭରିଛି ହୃଦୟ ପୁଣି !

ମୌସୁମୀ ଆସିଛି ମେଘକୁ ନେଇ

ବରଷିବ ବୋଲି ବରଷୁ ନାହିଁ !

ଚାରିଆଡ ଦିଶେ ଟାଙ୍ଗରା ଭୂଇଁ

ଧରାରେ ତପତ ଉଠୁଛି ଚେଇଁ !

ଜଙ୍ଗଲକୁ କାଟି କଲାଣି ପଦା

ବର୍ଷା ବିନା ଭୂଇଁ ହେଉନି ଓଦା !

ଧାରା ଶିରାବଣ ଆସିଲା ଦିନୁ

ଧରଣୀ ମାଆର ଶୁଖିଛି ପେନୁ !

ବିଜ୍ଞାନ ମଣିଷ ଅଜ୍ଞାନ ହୋଇ

ଜ୍ଞାନକୁ ତାହାର ଦେଲା ହଜାଇ !

ହଜିଛି ବିବେକ ହଜିଛି ବୁଦ୍ଧି

ହେଉନି ଆମର କାମନା ସିଦ୍ଧି !

ବରଷା ଦିନିଆଁ ପରିବା ଡାଲା

କାନ୍ଦୁଛି ଆମକୁ ଅନାଇ ଭଲା !

କେଉଁ କାଳ ଏବେ ଆସିଲା ପୁଣି

ପୋଛି ନେଲା ଚାଷୀ ଆଖିରୁ ପାଣି !

ଲୁଚାଇ ଲୁହକୁ କାନ୍ଦେ କଇଁ କଇଁ

ଚାଷ କି ହୋଇବ ବରଷା ନାଇଁ !

ଆକୁଳେ ସଭିଏଁ ପ୍ରାର୍ଥନା କରି

ବରଷା ରାଣୀକୁ ଆଣିବା ସ୍ମରି !