ମାଆ
ମାଆ
ଛୋଟରୁ ଜାଣିନି କ'ଣ
ମାଆ ସ୍ନେହ ମମତା
କେମିତି ଲାଗେ ବି ସିଏ
ନ ଥିଲା ବି ପତ୍ତା ।
ଆଖି ଖୋଲି ପ୍ରଥମେ ମୁଁ
ଦେଖିଲି ଯାହାକୁ
ହାତ ଖୋଲି ନେଇ ଗଲା
ମୋତେ ତା କୋଳକୁ ।
ତା କୋଳରେ ବଡ ହେଇ
ଦେଖିଲି ଦୁନିଆ
ସେଇ ମୋର ସାହା ହେଲା
ସେଇ ମୋର ମାଆ ।
ତା ହାତ ଧରିଣ ମୁହିଁ
ଚାଲି ଯେ ଶିଖିଲି
ତା କୋଳରେ ବସି କେତେ
କଥା ମୁଁ କହିଲି ।
ଝୁଣ୍ଟି ମୁଁ ପଡିଲେ ସିଏ
ଆସେ ପାଶେ ଧାଇଁ
ପଣତରେ ପୋଛି ଦେଇ
ନିଏ ସେ କୋଳେଇ ।
ତା କୋଳରେ ରହି ମୁହିଁ
କାନ୍ଦେ କୁଆଁ କୁଆଁ ।
ସେଇ ମୋର ସାହା ଥିଲା
ସେଇ ମୋର ମାଆ ।
ସକାଳୁ ଉଠି ବଢାରେ
ଭାତ ରାନ୍ଧି ଥାଏ
କ୍ଷୀର ଆଳୁ ଚକଟିଣ
ହାତେ ଖୋଇ ଦିଏ ।
ପୋଷାକ ପିନ୍ଧେଇ ଦେଇ
ଲଗାଏ ସେ କଳା
ମନ ଭୁଲାଣିଆ କଥା
କେତେ ସ୍ନେହ ବୋଳା ।
ତା ପାଇଁ ପାଇଲି ମୁହିଁ
ଏକ ରାହା ନୂଆ ।
ସିଏ ମୋର ସାହା ହେଲା
ସିଏ ମୋର ମାଆ ।
ଅଝଟ ହୋଇଲେ କେତେ
ମୋତେ ସେ ବୁଝାଏ
କି ସୁନ୍ଦର ଗୀତ ଗାଇ
ଜହ୍ନକୁ ଦେଖାଏ ।
ତା କୋଳରେ ଧରି ମୋତେ
ଶୁଆଇଣ ଦିଏ
ମାଆର ଉଷୁମ ମୁହିଁ
ତା' ଠାରୁ ପାଏ ।
ନ ଦେଖିଲେ ତାକୁ ମୋତେ
ଲାଗଇ ଛାନିଆଁ ।
ସିଏ ମୋର ସାହା ଥିଲା
ସିଏ ମୋର ମାଆ ।
ବଞ୍ଚିବା ଆଶା ନ ଥିଲା
ହେଇଥିଲା ଜର
ସେବା କରୁଥିଲା ସିଏ
ରହି ଉଜାଗର ।
ମୋ ମରଣ ପାଇଁ କେତେ
ହେଉ ଥିଲେ ଖୁସି
କାନ୍ଦେ ସିଏ ଦିନ ରାତି
ମୋ ପାଖରେ ବସି ।
ତା ଆଖିରୁ ଝରୁଥିଲା
ଲୁହ ଅମାନିଆ ।
ସିଏ ମୋ ଜୀବନ ଥିଲା
ସିଏ ମୋର ମାଆ ।
ଠାକୁରାଣୀ ପାଖେ ଯାଇ
ଅଧିଆ ପଡିଲା
ଘୋଡା ଦେବ ବୋଲି କାନ୍ଦି
ମାନସିକ କଲା ।
ସେଇ ଦିନ ଠାରୁ ଦେହ
ସୁସ୍ଥ ହେଇଗଲା
ଛାଇ ପରି ସର୍ବଦା ମୋ
ପାଖେ ସେ ରହିଲା ।
ତା ପାଇଁ ପାଇଲି ମୁହିଁ
ଜୀବନ ତ ନୂଆ ।
ସିଏ ମୋର ସାହା ଥିଲା
ସିଏ ମୋର ମାଆ ।
ସାଙ୍ଗରେ ଧରିଣ ଯାତ
ଦେଖାଇଣ ନିଏ
କରାଟୁ ପଇସା କାଢି
ଖାଇବାକୁ ଦିଏ ।
କେତେ ଗପ କହୁ ଥାଏ
ସେ ପୁରାଣ କଥା
ରାଜା ରାଣୀ ପୁଣି ପରୀ
ରାଇଜର ଗାଥା ।
ସଂସ୍କାର ଶିଖାଏ ନିତି
କେତେ ନୂଆ ନୁଆ ।
ସିଏ ମୋର ସାହା ଥିଲା
ସିଏ ମୋର ମାଆ ।
ତା' ଲାଗି ବିଦ୍ୟାଳୟେ
ପାଠ ମୁଁ ପଢିଲି
ଦୁଃଖ କ'ଣ ନା ଜୀବନେ
କିଛି ଜାଣି ଥିଲି ।
ଶିଖାଏ ସଂସ୍କାର ସିଏ
ଧୈର୍ଯ୍ୟ ବି ଶିଖାଏ
ତା ପାଇଁ ଠାକୁରଙ୍କୁ
କେତେ ଭଲ ପାଏ ।
ଶିଖାଇଣ ଦେଲା ସିଏ
ଭକତି ବି ନୂଆ ।
ସିଏ ମୋର ସାହା ଥିଲା
ସିଏ ମୋର ମାଆ ।
ବଡ ହେଇ ଗଲି ଯେବେ
ସିଏ ଚାଲି ଗଲା
କଥା ଦେଇ ଅଧା ବାଟେ
ମୋତେ ଠକି ଦେଲା ।
ଖସି ଗଲା ପାଦ ତଳୁ
ମୋହର ଯେ ମାଟି
ଲୋତକରେ ଭିଜେ ଗଲା
ମୋ ଆଖି ଦୁଇଟି ।
ନିଆଁ ଜାଳି ଚୂଲିରେ ମୁଁ
ଭାଜି ଦେଲି ଲିଆ ।
ସେ ଲିଆରେ ଶେଷ ବିଦା
ହେଇ ଥିଲା ମାଆ ।
ଏତେ ବଡ ଦୁନିଆରେ
ଏକା ହେଇ ଗଲି
ସଂଘର୍ଷ କରିଣ ନିଜେ
ବଞ୍ଚିବା ଶିଖିଲି ।
ପାଇଗଲି ଠାକୁରଙ୍କୁ
ସାଥି ହେଲେ ମାଆ
ଆଣି ଦେଲେ ଦୁନିଆରେ
ଜୀବନ ସେ ନୂଆ ।
ତା ଭିତରେ ଖୋଜୁଛି ବି
ମୁଁ ସେଇ ମାଆ ।
ଏବେବି ଏ ମନ ମୋର
ତା କଥା ଭାବୁଛି
ତା ଭଲ ପାଇବା ସ୍ମୃତି
ଆଖିରେ ଭାସୁଛି ।
ସିଏ ଗଲା ପରେ ମାଆ
ଡାକ ମୋ ହଜିଛି
ତାର ସ୍ଥାନ ନା ଆଉ
କେ ନେଇ ପାରୁଛି ।
ସିଏ ଆଉ କେହି ନୁହେଁ
ମୋ ଜେଜେମାଆ।
ସିଏ ମୋର ସାହା ଥିଲା
ସିଏ ମୋର ମାଆ ।