ବର୍ଷା ତୁମକୁ ଛୁଇଁଲା ପରେ

ବରଷା ତୁମକୁ ଛୁଇଁଦେଲା ଯେବେ

ଭିଜିଗଲ ତୁମେ ସଖୀ

ତୁମ ମନତଳେ ସପନ ଖେଳିଲା

ରଙ୍ଗ ବୋଳିହେଲା ଆଖି I

ପିନ୍ଧା ବସନକୁ ଦେହରେ ତୁମର

ଖୁସିରେ ଜଡାଇ ଦେଲା 

ତୁମ ଓଦାଦେହ ଓଦା ବସନରେ

ଚିକ୍ ଚିକ୍ କରୁଥିଲା I

ଟୋପାଟୋପା ହୋଇ ମୁହଁରୁ ଲୋ ସଖୀ

ଝରି ଯାଉଥିଲା ମୋତି

ଦେହରୁ ତୁମର ଆଲୋକ ଝରିଲା

ଉଙ୍କି ମାରୁଥିଲା ପ୍ରୀତି I

ଭାବନାରେ ତୁମ ମଳୟ ବୋହିଲା

ଆଖି ନଇଁଗଲା ଲାଜେ

ଚାରିଆଡେ ଖାଲି ଆଲୁଅ ଦିଶିଲା

ତୁମରି ଦେହର ତେଜେ I

ସାତସୁର ଦେଇ ଗୀତ ଗାଇ ଗାଇ

ବସିଗଲ ହୃଦୟରେ

ଭଲ ପାଇବାର ଅଗାଧ ସାଗର

ସୃଷ୍ଟିହେଲା ମନତଳେ I

ଆଲିଙ୍ଗନ କରି ଗଣ୍ଡଦେଶେ ତୁମ

ଚୁମାଟିଏ ଦେଲି ଆଙ୍କି

ଅତି ସରାଗରେ ମୋ ପାଖରେ ବସି

ହସିଦେଲ ତୁମେ ସଖୀ I