ବର୍ଷା ଆଉ ଆମ ଗାଁ

ବରଷା ଆସିଲେ ସବୁଜ ପଣତ

ଘୋଡାଇ ହୋଇ ମୋ ଗାଁଆଁ

ବରଦ ମୁଦ୍ରାରେ ଢାଳେ ଶୁଭାଶିଷ 

ସୁଶୀତଳ ସ୍ନିଗ୍ଧ ଛାୟା ।

ହସି ଉଠେ ତାର ବିଲ ତୋଟାମାଳ

ଦିଶେ ସବୁଜ ସୁନ୍ଦର 

ଉଛୁଳି ଉଠଇ ଖାଲ ଖମା ନାଳ

ପୂର୍ଣ୍ଣ ହୁଏ ସରୋବର ।

ପଡିଆ ବାଲିରେ ଛତୁ ନାନା ଜାତି

ଫୁଟି ଉଠେ ଛତ୍ର ତୋଳି

ଚାଲେ ଢଳି ଢଳି ସାଧବ ବୋହୁଟି

ଦେହ ନାଲି ମଖମଲି ।

ସାରୁ ବୁଦା ମୂଳେ ବେଙ୍ଗ ଓ ବେଙ୍ଗୁଲି

କରନ୍ତି କେଏଁ କଟର

ଗରଜଇ ନିଶା ଝିଙ୍କାରୀ ଶବଦେ

ବରଷଇ ଝରଝର ।

ଘର ଅଗଣାର ପାଣିର ସୁଅରେ

କାଗଜ ଡଙ୍ଗା ଭସାଇ 

ତାଳି ମାରି ଗୀତ ଗାଆନ୍ତି ପିଲାଏ 

ନାଚନ୍ତି ଆନନ୍ଦ ହୋଇ ।

ଭାରି ଆପଣାର ଅତି ପରିଚିତ

ବର୍ଷା ଆଉ ଆମ ଗାଆଁ

ସୁସାନ୍ନିଧ୍ଯ ଯୋଗେ ଉନ୍ମେଷେ ଜୀବନ

ଉଜ୍ଜ୍ବଳେ ସୁଖି ଦୁନିଆଁ ।