ବୋଉ

ଜୀବନେ ଜୀବନ୍ତ ଦେବୀ ମହାଦେବୀ 

ପୃଥିବୀ ଠାରୁ ସେ ଗରୁ

ମର୍ତ୍ତ୍ୟ କଲ୍ଲୋଳିନୀ ଆକାଶର ଗଙ୍ଗା 

ଜୀବନର କଳ୍ପ ତରୁ

ପବିତ୍ର ଅମୀୟ ଧାରା

ଜୀବନ ଆକାଶ ନିଶିଥ ଅନ୍ଧାରେ

ଏ ଆକ୍ଷିର ଧ୍ରୁବ ତାରା ।

ବାତ୍ସଲ୍ୟ ମମତା ମନ୍ଦାକିନୀ ଧାରା 

  ସେନେହର ସ୍ଵତ୍ସ ସିନ୍ଧୁ

ଶାନ୍ତ,ସ୍ନିଗ୍ଧ ଯାର ବିମଳ ହୃଦୟ

    ଅମୃତ କରୁଣା ବିନ୍ଦୁ

ପୀୟୂଷ ମଧୁ ପ୍ଳାବିନୀ

ତ୍ୟାଗ ମୂର୍ତ୍ତି ମନ୍ତ ମହିସ୍ମତୀ ଦେବୀ

   ସେ ଅମୂଲ୍ୟ ସଞ୍ଜିବନୀ ।

ଯା ଚରଣେ ସବୁ ତୀର୍ଥ ସମ୍ମିଳିତ

   ଯା ଚରଣ ରେଣୁ ସ୍ପର୍ଶେ

ସକଳ କଳୁଶ ଧୋଇ ହୋଇଯାଏ

   ତା ସମ ନାହିଁ କେ ବିଶ୍ଵେ

ଯା ବକ୍ଷ କ୍ଷରିତ ସୁଧା

ଗଢିଛି ଏସାରା ବିଶ୍ଵ ଜୀବନ

   ମମତାମୟୀ ସେ ମାଆ ।

ଜୀବନ ସୂର୍ଯ୍ୟର ପହିଲି କିରଣ

   ଫୁଲରୁ କୋମଳ ସ୍ପର୍ଶ

ବଜ୍ରରୁ କଠିନ କରିପାରେ ଅଙ୍ଗ

   ଯାହାର କ୍ଷଣିକ ଦୃଶ୍ୟ

ତା ପରଷା ଭାତ ଥାଳି

ମହାପ୍ରସାଦ ର ଭ୍ରମ ସୃଷ୍ଟିକରେ

   ଲାଗେ ଅମୃତରୁ ବଳି ।

ଜୀବନର ଛନ୍ଦ ଜୀବନର ସ୍ଵର

    ଜୀବନ ର ଗତିପଥ

ଦିଏ ଯେ ବତାଇ ସଂସାର ଦହନେ

    ବଂଚିବାର ମହା ମନ୍ତ୍ର

ସେହି ମହାଦେବୀ ବୋଉ

ତା ଚରଣ ତଳେ ଲହରୀ ଖେଳଇ କେତେ

   ଜୀବନ୍ତ ଜୀବନ ଢେଉ ।