Library
ବନ୍ୟଜନ୍ତୁଙ୍କର ଅନ୍ତଃସ୍ବର
ବନ୍ୟଜନ୍ତୁଙ୍କର ଅନ୍ତଃସ୍ବର
ଶୁଣ ଶୁଣ ଆହେ ଆଜିର ମାନବ
ଶୁଣ ଆହେ ସରକାର
ଆମର ବି ଅଛି ଅଭାବ ଅନେକ
ଆମର ବି ଅଛି ଦରକାର ।
ତୁମପାଇଁ ଯେହ୍ନେ ଇନ୍ଦିରା ଆବାସ
ସାଥେ ବିଜୁ ପକ୍କାଘର
କେତେ ଥଇଥାନ ଆବାସ ଯୋଜନା
ପ୍ରଧାନ ମନ୍ତ୍ରୀଙ୍କର ।
ବାସହୀନ ଆମ ଦୁଃଖ ଅପ୍ରମିତ
ନାହିଁ ଆମ ପାଇଁ ଆହାର
ଖାଦ୍ୟ ସୁରକ୍ଷାର ଆଇନ୍ ଆମପାଇଁ
ଜଣା ନାହିଁ କେତେ ଦୂର ।
ଖାଦ୍ୟ ନିରାପତ୍ତା ପୁନର୍ବାସନୀତି
ସବୁ ତୁମ ପାଇଁ କର
ଭାବିଦେଖ ବାରେ ଖାଦ୍ୟନିରାପତ୍ତା
ଆମର ନାହିଁ କି ଦର୍କାର ।
ଅଣୁଠାରୁ ରେଣୁ ପଲ୍ଲୀଠାରୁ ଦିଲ୍ଲୀ
ବଣରୁ ଭୁବନେଶ୍ବର
ଦିଲ୍ଲୀ ଚଲୋ ଆଉ ଭୁବନେଶ୍ବର ଚଲୋ
ଡାକେ କମ୍ପିବ ଆମର ।
ହେ ମଣିଷ ଜାତି ଆହେ ସରକାର
ଚିନ୍ତା କରି ଦେଖ ଏଥର
କେବେଠାରୁ ହେଲ ଅମଣିଷ ତୁମେ
ହେଲ ପୁଣି ସ୍ବାର୍ଥପର ।
ଆମ ପିଠିପରେ ହେଉଥିଲ ତୁମେ
ନିତି ନିତି ସବାର
ଯୁଦ୍ଧ କ୍ଷେତ୍ରଠାରୁ ନଗର ଭ୍ରମଣ
ସବୁଠି ସାହା ତୁମର ।
କାର୍ ବସ୍ ବ୍ୟୋମ- ଯାନ ରେଳଗାଡି
କରିଅଛ ଆବିଷ୍କାର
ସେଇଥିପାଇଁକି ଆମକୁ ଭୁଲିଛ
କରି ଗର୍ବ ଅହଂକାର ।
ଭାଙ୍ଗି ଦେଉଅଛ ଆମ ବାସ ସ୍ଥାନ
ଗଢି କାରଖାନା ନଗ୍ର
ବଣଜଙ୍ଗଲକୁ ଲୋପ କରିଅଛ
ଛଡାଇ ନେଇ ଆହାର ।
ଆମ ପାଇଁ ନାହିଁ ବିସ୍ଥାପନ ନୀତି
କାହିଁକି ଦିଅ ଉତ୍ତର
ତୁମପାଇଁ କର ପୁନର୍ବାସ ନୀତି
କେବେ ହେବ କୁହ ଆମର ।
ଦୃଢ ପ୍ରତିବାଦ କରୁଅଛୁ ଆମେ
ଜଣାଇ ଦାବି ଆମର
ଆମ ପୁନର୍ବାସ ଖାଦ୍ୟର ସୁରକ୍ଷା
ସ୍ବାଧିନତା ରକ୍ଷାକର ।
ହେ ମଣିଷ ଜାତି ଜାଣି ରଖ ତୁମେ
ଶେଷ ମହଲତ ଆମର
ଆମ ଦାବି ଅଟେ ନ୍ୟାର୍ଯ୍ୟ ଦାବି ତୁମେ
ମାନି ନିଅ ସରକାର ।
ଯଦି ନ ମାନିବ ନିଆଁ ଜଳାଇବୁ
ରଚାଇଦେବୁ ହାହାକାର
ଭାଙ୍ଗିଦେବୁ ଆମେ ବଜ୍ର ମୂଷଳକୁ
ଉଜାଡିବୁ ଗ୍ରାମ ନଗ୍ର ।
ପାଇବନି ତୁମେ ଅମ୍ଳଜାନଟିକେ
ଶ୍ବାସରୋଧ ହେବ ତୁମର
ବ୍ୟାଧି ଦୁର୍ବିପାକ ମହାମାରୀ ଦ୍ବାରା
ଉଚ୍ଛନ୍ନ ହେବ ସଂସାର ।
ମାନବ ସଭ୍ୟତା ଅକାଳେ ହଜିବ
ଏଇ ସବୁଜ ଗ୍ରହର
ଏ ଦୁଷ୍ଟ ମାନବ ମୃତ ଦେହପରେ
ସୃଷ୍ଟିହେବ ଜଙ୍ଗଲର ।
ହସିବ ଏ ଧରା ପୁଣି ଆଉଥରେ
ଆଗମନେ ନବ ଯୁଗର
ଅକ୍ଷୟ ହୋଇବ ଧର୍ମ ଜଗତରେ
ଜୟ ସତ୍ୟନ୍ୟାୟ ପୁଣ୍ୟର ।
