ବନସ୍ତେ ଡାକିଲା ଗଜ

ବନସ୍ତେ ଡାକିଲା ଗଜ ପାଖେଇ ଆସିଲା ପରବ ରଜ

ପରବ ରଜ ଲୋ ପଲ୍ଲୀଭୂଇଁ ସଜବାଜ 

ବଉଳ ଲୋ ପଲ୍ଲୀଭୂଇଁ ସଜବାଜ ।

ଚୂନାକୁଟା ବିରି ବଟା ତିଆରି ହୋଇବ କେତେ ଯେ ପିଠା

କେତେ ଯେ ପିଠା ଲୋ ପାଟିକୁ ଲାଗିବ ମିଠା 

ବଉଳ ଲୋ ପାଟିକୁ ଲାଗିବ ମିଠା ।

ନିଆରା ପହିଲି ରଜ ସଜ କରିଦେବେ ନୂଆ ଭାଉଜ

ନୂଆ ଭାଉଜ ଲୋ ଆସ ହୋଇ ସଜବାଜ 

ବଉଳ ଲୋ ଆସ ହୋଇ ସଜବାଜ ।

ତୋଟାରେ ଭଳିକିଭଳି ଲାଗିଅଛି ପରା କେତେ ଯେ ଦୋଳି

କେତେ ଯେ ଦୋଳି ଲୋ ଝଲୁଥିବା ହଲିହଲି 

ବଉଳ ଲୋ ଝୁଲୁଥିବା ହଲିହଲି ।

ଗାଇ ରଜଦୋଳି ଗୀତ ଝୁଲିବା ଆମେରେ ଯେତେକ ମିତ

ଯେତେକ ମିତ ଲୋ ଖୁସିହୋଇ ଅପ୍ରମିତ 

ବଉଳ ଲୋ ଖୁସିହୋଇ ଅପ୍ରମିତ ।

ରଜପାନେ ଓଠ ନାଲି ଯେତେ ସାଙ୍ଗସାଥୀ ହୋଇଣ ମେଳି

ହୋଇଣ ମେଳି ଲୋ ଘର ଘର ଯିବା ବୁଲି 

ବଉଳ ଲୋ ଘର ଘର ଯିବା ବୁଲି ।

ଖେଳିବା ଲୁଡୁ ତାଆସ ଭାଉଜଙ୍କ ସଙ୍ଗେ ଥଟ୍ଟାତାମସା

ଥଟ୍ଟା ତାମସା ଲୋ ଭାରି ମଜ୍ଜା ତାଙ୍କ ଭାଷା

ବଉଳ ଲୋ ଭାରି ମଜ୍ଜା ତାଙ୍କ ଭାଷା ।

ବାଳକେ ବାଗୁଡି଼ ଖେଳେ ମାତିଛନ୍ତି ଦେଖ ସଙ୍ଗୀ ମେଳରେ

ସଙ୍ଗୀ ମେଳରେ ଲୋ ଉଛୁଳନ୍ତି ହରଷରେ

ବଉଳ ଲୋ ଉଛୁଳନ୍ତି ହରଷରେ ।

ଯୁବକ ବୟସ୍କମାନ କ୍ୟାରମ୍ ପଶା ଖେଳେ ରଖନ୍ତି ଧ୍ୟାନ

ରଖନ୍ତି ଧ୍ୟାନ ଲୋ ହସି ଉଠୁଥାଏ ମନ

ବଉଳ ଲୋ ହସି ଉଠୁଥାଏ ମନ ।

ମାଆ ପରା ସର୍ବଂସହା କାମ କରିକରି ସିଏ ହାଲିଆ

ସିଏ ହାଲିଆ ଲୋ ତଥାପି ଚାନ୍ଦଉଦିଆ

ବଉଳ ଲୋ ମୁଖଟା ଚାନ୍ଦଉଦିଆ ।

ସଂକ୍ରାନ୍ତି ଭୂଇଁନହଣ କଟିବ ଏମିତି ତିନୋଟି ଦିନ

ତିନୋଟି ଦିନ ଲୋ ପରେ ବସୁମତୀ ସ୍ନାନ

ବଉଳ ଲୋ ପରେ ବସୁମତୀ ସ୍ନାନ ।

ରଜର ନାନା ମଉଜ ପାଞ୍ଚଦିନ ଧରି ଅଭୁଲା ହେଜ

ଅଭୁଲା ହେଜି ଲୋ ଶିରୀଗୋବିନ୍ଦ ତୁ ଭଜ

ବଉଳ ଲୋ ଶିରୀଗୋବିନ୍ଦ ତୁ ଭଜ ।