ବନ୍ଧୁତ୍ୱର ସ୍ମୃତି
ବନ୍ଧୁତ୍ୱର ସ୍ମୃତି
ବର୍ଷ ପରେ ବର୍ଷ କେତେ ବିତି ଗଲା
ବୟସ ଯାଉଛି କହି କହି,
ତଥାପି ଅତୀତ କହୁଛି ତୁନି ତୁନି ଆଜି
ଖୋଲି ସ୍ମୃତିର ଅଭୁଲା ବହି |
ପିଲାଦିନ କଥା ମନେପଡେ ଯେବେ ଆଜି
ମନେ ମନେ ହସେ ବସି,
ଭାବେ ଏବେ ସେହି ଦିନ ସବୁ ସତେ
ଯାଇଛି ଆମ ହାତରୁ ଖସି |
ସେହି ଥଟ୍ଟା ମଜା, ଗୋଡ଼ ଟଣା ଟଣି
ଦୁଷ୍ଟାମୀ ଆଉ ଆମ ଖେଳ,
ସବୁରି ଭିତରେ ଥିଲା ଏହି ବନ୍ଧୁତ୍ୱର ଭାବ
ଖାଲି ବୟସ ହୋଇଛି କାଳ |
ତଥାପି ଭାବୁଛି ଦୁନିଆ ଯେତେ ଯାହା କହୁ
ବୟସ ବଢିଛି ସମୟର ସଙ୍ଗେ,
ତଥାପି ଏହି ମନ ଆଉ ବନ୍ଧୁତ୍ୱର ସେତୁ
ଏବେବି ତାଜା ତାଜା ଲାଗେ |
ବୟସକୁ ନେଇ ସମୟ ଖେଳୁଛି ସିନା ଖେଳ
ହେଲେ ଆମ ଚିନ୍ତନ ଆଜି,
ସମୟକୁ ଦେଖି ହାରିନାହିଁ ଶକ୍ତି ଆଉ ଉଦ୍ଦୀପନା
ମାରିଛି ତାର ସାଥେ ବାଜି |
କାଳର ଚକ୍ରାନ୍ତ କାନ୍ଧରେ ଭରିଛି ଦାୟିତ୍ୱର ବୋଝ
ଯାହା ରଖିଛି ଆମକୁ ଦୁରେଇ,
କିନ୍ତୁ ଆମ ବନ୍ଧୁତ୍ୱର ଡୋର ବାନ୍ଧି ରଖିଛି
ଯାହା କେହି ନପାରେ ଭୁଲାଇ |
ଥିଲେ ଆମେ ବନ୍ଧୁ, ଏବେ ବି ରହିଛେ
ରହିଥିବା ଅନ୍ତ ବେଳ ଯାଏ,
ଏହା ଅଟେ ଅମର ଯୁଗ ଯୁଗ ପାଇଁ
ଦେଖି ସମୟ ବି ହାରିଯାଏ |
ଦେଖିଛି ଅତୀତ,ରହିଛି ସାକ୍ଷୀ ଭବିଷ୍ୟତ ପାଇଁ
ଏହା ଆମ ବନ୍ଧୁତ୍ୱର ସ୍ମୃତି,
ଏହା ଅଟେ ଆମ ଜୀବନର ଅମୂଲ୍ୟ ସମ୍ପଦ
ରଖିବା ଏହାକୁ ଆମେ ସାଇତି |