ବନ୍ଦେ ଶ୍ରୀରାମ

ବନ୍ଦେ ଶ୍ରୀରାମ ସୁନ୍ଦର ଶ୍ୟାମଘନ ମୂର୍ତ୍ତୀ

ଧନୁର୍ଦ୍ଧାରୀ ସତ୍ୟ ସନ୍ଧ ନବଘନ କାନ୍ତି l

ଶ୍ରୀ ଦଶରଥ ତନୟ ପ୍ରଭୁ ସୀତା କାନ୍ତ

ପ୍ରାଣପଛେ ଯାଉ ନିତି ସଦା ଥାଉ ସତ୍ୟ l

ବିଷ୍ଣୁ ଅଂଶେ ଅବତରି ଥିଲ ଚାରି ଭ୍ରାତ

ଶ୍ରୀରାମ,ଲକ୍ଷ୍ମଣ,ଶତ୍ରୁଘନ,ଶ୍ରୀ ଭରତ l

ଲକ୍ଷ୍ମୀ ଅଂଶୁ ଜନ୍ମ ଲଭି ଜନକ ନନ୍ଦିନୀ

ପତିବ୍ରତାଧର୍ମେ ବ୍ରତା ଫାଟିଲା ମେଦିନୀ l

ପିତୃ ସତ୍ୟେ ଚୌଦ ବର୍ଷ କଲ ବନବାସ

ସୀତା ହରି ରାବଣର ବଂଶ ଗଲା ନାଶ l

କପି ଭଲ୍ଲୁକେ ବାନ୍ଧିଲ ମହାସିନ୍ଧୁ ଭେଳା

ରାମେଶ୍ୱର ଥାପି ଜଳେ ପଥର ଭାସିଲା l

ଦ୍ରୋହ କରି ମହାପାପେ ହତ ସ୍ବର୍ଣ୍ଣଲଙ୍କା

ଶରଣ ସମ୍ଭାଳି ଭକ୍ତ ବିଭୀଷଣେ ଦୀକ୍ଷା l

ସୁଗ୍ରୀବେ ମଇତ୍ରହେଲ ବାଳିକୁ ସଂହାରି

ଧର୍ମ ସଂସ୍ଥାପିଲ ଦୟାମୟ ରାବଣାରୀ l

ନଳ,ନୀଳ ସୁଗ୍ରୀବ,ଜଟାୟୁ,ଜାମ୍ବବାନ

ଅଞ୍ଜନା ବାୟୁ ନନ୍ଦନ ବୀର ହନୁମାନ l

ଜନ୍ମ ଜନ୍ମ ତପକରି ହୋଇଲେ ସେବକ

ପାଦେ ତାଙ୍କ ନମସ୍କାର ମୁଁ ଅଜ୍ଞାନ ମୁର୍ଖ l

ଶ୍ରୀରାମ, ଲକ୍ଷ୍ମଣ, ଶ୍ରୀଭରତ, ଶତ୍ରୁଘନ

ଭକ୍ତ ବିଭୀଷଣ ପାଦେ କୋଟିଏ ନମନ l

ରାମନାମ ସତ୍ୟ ଅଟେ ଭବାବ୍ଧି ନଉକା

ଭବ କର୍ଣ୍ଣଧାର ରାମନାମ ଗୋଟି ଏକା l

ପଥ ହରା ପଥିକ ମୁଁ ଭବ ଅରଣ୍ୟରେ

ପାରି କର ରାମନାମ ସଦା ମୁହିଁ ସ୍ମରେ l