ବିଶ୍ରାନ୍ତି ନେବାର ସମୟ

“ ଏ ମା କିଛି ଦେ ନା’’ଏ ଡାକରେ ପଛକୁ ଫେରିଲି ଚାହିଁ l

ରାତି ଦିନ ପଢାରତ ଛାତ୍ରୀ, ଅଭ୍ୟସ୍ତ ନଥିଲି ଏପରି ଶୁଣିବା ପାଇଁ ll

ପଛକୁ ଫେରିଲି ଚାହିଁ, ଦୟନୀୟ ବେଶେ କେ ଜଣେ ଚାହିଁଛି ରହି l

ମୋ ମୁଠାକ ପାଇଁ ନେହୁରା ହୋଇ, ହାତ ଦେଇଛି ପତାଇll

ଦୁଃଖ ଲାଗିଲା, ଦୟା ବି ଲାଗିଲା, କିଛି କ୍ଷଣ ପରେ ପୁଣି ରାଗିଗଲି ମୁହିଁ l

କାହିଁକି ଜଣେ ଏପରି ବଞ୍ଚିବ, ବଞ୍ଚିବାର ଆଉ କଣ କିଛି ଉପାୟ ନାହିଁ ll

ଦୁର୍ବଳ ହାତେ ଲଂଗଳା ଛୁଆଟେ ଧରି ଦେଖାଉଛି, ତାକୁ କାଖରେ କାଖେଇ l

ମୋ ପାଇଁ ନ ଦେଲେ ନାହିଁ ମା, ତାକୁ ଗଣ୍ଡେ କିଛି ହେଲେ ଯା ଦେଇ ll

ଧରମ ହୋଇବ ତୋର, ଦେଇ ଦେଲେ ତୋର କିଛି ସରିଯିବ ନାହିଁ l

ଦବା ବାଲା ତତେ ଅନେକ ଦେଇଛି ମା’ ଲୋ, ମତେ କିଛି ଦେଇ ନାହିଁ ll

ପାତର ଅନ୍ତର କରିବା ଅଭ୍ୟାସ ତାର ଏ ଯାଏ ଯାଇନାହିଁ l

କାହାକୁ ଦଉଛି କାହାକୁ ଠକୁଛି, ଏ ହିସାବ ଏକା କହି ପାରେ ସେହି ll

ସବୁ ଦୋଷ ଲଦି ଉପର ବାଲାଙ୍କ ଉପରେ, ନିଶ୍ଚିନ୍ତ ଗଲା ସେ ହୋଇ l

କିନ୍ତୁ ମୋ ମନ ଭିତରେ, ସମାଧାନ ଖୋଜି ଛଟପଟ ହେଉଥିଲି ମୁହିଁ ll

ମୋ ପରି ସିଏବି ତ ନାରୀ, ଦୁଇ ହାତ ଦୁଇ ଗୋଡ ଦୁଇ ଆଖି ଥାଇ l

ମୁଁ ଯଦି ପାରୁଛି ଏକା ଏକା ବଞ୍ଚି, ସେ କାହିଁ ପାରିବ ନାହିଁ ll

କେଉଁ ରାସ୍ତାରେ ଗଲେ, ସିଧା ଚାଲିବ ସେ ଏପରି ଝୁଣ୍ଟିବ ନାହିଁ l

ଏଇ ଶିକ୍ଷା ତାକୁ କେବେ ବୋଧେ, କେହି ଶିଖାଇ ତ ନାହିଁ ll

ସେ ପାଇଁ ସହଜ, ସିନା କଦର୍ଯ୍ୟ ରାସ୍ତାକୁ, ଏପରି ନେଇଅଛି ଆପଣେଇl

ଭାଗ୍ୟ ଆଉ ଭଗବାନଙ୍କ ଉପରୁ କିନ୍ତୁ ଏଯାଏ ଭରଷା ଦେଇନି ତୁଟାଇ ll

ସେ ପାରିବ ନାହିଁ, କିନ୍ତୁ ମୁଁ ତ ପାରିବି, ତାକୁ ଭଲ ରାସ୍ତା କିଛି ଦେଖାଇ l

ମୁକ୍ତ କରିବି ଏ ଜୀବନରୁ, ବଞ୍ଚିବାର ଅନ୍ୟ ମାଧ୍ୟମର ଶିକ୍ଷା ଦେଇ ll

ତା ହାତରେ କିଛି ଦେଲି ସତ, ଅଶାନୁରୁପ ଯଦିଓ ଲାଗିଲା ନାହିଁ l

ସ୍ଥାୟୀ ସମାଧାନ ଏ ସମସ୍ୟାର, ନିଶ୍ଚେ ଖୋଜିବି ଭାବି, ସେ ସ୍ଥାନ ଛାଡିଲି ମୁହିଁ l

ନୁହେଁ ମନ୍ତ୍ରୀ ବା ନେତା ସିନା ତଥାପି କରିବି କିଛି ପ୍ରତିକାର ଏମାନଙ୍କ ପାଇଁl

ଏ ଦେଶର ଜଣେ ଶିକ୍ଷିତା ଝିଅ ମୁଁ, ଏତିକି କଣ କାହା ପାଇଁ କରି ପାରିବି ନାହିଁ ll

ଏ ଦେଶର ଜଳ ବାୟୁର ଋଣ ସୁଝିବାର ସଦୁପୋଯୋଗ ଯିବ ହୋଇ l

ସେଇ ହେବ ମୋର ଉପଯୁକ୍ତ ଉପହାର ମୋ ଦେଶ ଜାତି ପାଇଁ ll

ଉଚ୍ଚ ଶିକ୍ଷା ପାଇଁ ଯାଉଥିଲି ବିଦେଶକୁ, ସେଠାରୁ ଫେରିଲି ଘରକୁ ମୁହିଁ l

ଉଚ୍ଚ ଶିକ୍ଷାର ଡିଗ୍ରୀ ଧରି, ଗୋଟେ ପେଟକୁ ଭଲରେ ପୋଷିବା ପାଇଁ ll

ଯିବି ଏତେ ଦୂରେ ସ୍ବାର୍ଥ ପର ହୋଇ, ସବୁକୁ ଅଣଦେଖା କରି ଦେଇ l

ଯଦି ଏତେ ପେଟ, ଭୋକେ ଛଟପଟ ହେଉଥିବ, ଆହାର ଗଣ୍ଡାକ ପାଇଁll

କି କରିବି ସେ ଶିକ୍ଷା ଦୀକ୍ଷା ଉଚ୍ଚ ପଦ ଓ ସମ୍ମାନ୍ନ ଯଦି କାହା ଉପକାରରେ ଲାଗିବ ନାହିଁ l

ନିଜକୁ କି କେବେ କ୍ଷମା ଦେଇ ନିଶ୍ଚିନ୍ତେ ପାରିବି କେବେ ହେଲେ ଶୋଇ ll

ସେ ଦିନର ସେଇ ଦୁଃଖିନୀ ନାରୀର ଅସହାୟ ଆକ୍ଷି ବହୁ କଥା ଦେଇଥିଲା କହି l

ଲାଗିବ ଯଦି ଦେଶ ସେବାରେ ଲାଗ ତା ଠୁ ବଡ ଡିଗ୍ରୀ ଆଉ କଣ ପାରେ ଥାଇ ll