Library
ବିରାଜିତ ହୁଏ ବସନ୍ତ ରାଜ
ବିରାଜିତ ହୁଏ ବସନ୍ତ ରାଜ
ବିରାଜିତ ହୁଏ ବସନ୍ତ ଧରାରେ
ଧରଣୀ ଯେ ହରା ଭରା
ମୁୁହଁ ଲୁଚାଇଲା ଶୀତ ଋତୁ ପରା
ମଳୟ ବାଆ ବହିଲା ।
ବିରାଜିତ ହେଲା ବସନ୍ତ ରାଜ ଯେ
ପୁଷ୍ପ ମାନଙ୍କର ଭିଡ଼
ଧରଣୀ ରାଣୀର ନବ ଉନ୍ମାଦନା
କୁସମେ କରେ ସ୍ଵାଗତ ।
ବିରାଜିତ ହେଲା ବସନ୍ତ ରାଜ ଯେ
ବର୍ଣ୍ଣ ବର୍ଣ୍ଣାଳୀର ଥାଟ
ସୁଷମା ମଣ୍ଡିତ ଧରଣୀ ରାଣୀ ଯେ
ସବୁଜ ଶୋଭା ମଣ୍ଡିତ ।
ବିରାଜିତ ହେଲା ବସନ୍ତ ରାଜ ଯେ
ଧରାରେ କୁସୁମ ମେଳା
ଜୁଇ, ଜାଇ, ହେନା, କାଞ୍ଚନ, ମାଳତୀ
ମାଧବୀ,ଅପରାଜିତା ।
ପଳାଶ କୁସୁମ ଦିଶେ ଅନୁପମ
କେତକୀ ସଜ ହୋଇଛି
ପ୍ରତୀକ୍ଷାର ଅନ୍ତ ହୋଇଛି ତାହାର
ଜାଗର ମେଳା ଆସିଛି ।
ବିରାଜିତ ହୁଏ ବସନ୍ତ ରାଜ ଯେ
ପାଦପ ପତ୍ର ମଣ୍ଡିତ
ମଳୟ ପବନେ ଦୋହଲି ଦୋହଲି
କରୁ ଅଛି ଯେ ସ୍ୱାଗତ ।
ବିରାଜିତ ହୁଏ ବସନ୍ତ ରାଜ ଯେ
ଆମ୍ବ ବଉଳ ବାସ୍ନାରେ
ଆମ୍ବ୍ର କୁଞ୍ଜେ ପରଭୃତ କୁହୁ ତାନ
ଜନ ମନ ହରୁ ଥାଏ ।
ମତୁଆଲା ହୋଇ ଭୂମର ଭ୍ରମୁଛି
ପ୍ରଜାପତିଙ୍କର ଭିଡ଼
ଅପୂର୍ବ ଆଭାରେ ପ୍ରକୃତି ମଣ୍ଡିତ
ଛୁଟେ ମହକର ସ୍ରୋତ ।
ହଳଦୀ ବସନ୍ତ ଆନମନା ହୋଇ
ନୀଡ ପାଇଁ ତତପର
ମାତୃତ୍ଵ ସ୍ୱପ୍ନରେ ଅଥୟ ହେଉଛି
ମନେ ଆନନ୍ଦର ଝର ।
ବିରାଜିତ ହୁଏ ବସନ୍ତ ରାଜ ଯେ
ଷଡ଼ଋତୁଙ୍କର ରାଜା
ସଙ୍ଗେ ଆଣି ଆସେ ଜାଗର ଜାତରା
ଆଣେ ଦୋଳ ହୋଲି ଖେଳା ।
ରାଧାକୃଷ୍ଣଙ୍କର ଫଗୁ ଖେଳେ ମନ
ଆନନ୍ଦେ ମଗନ ହୁଏ
ଶ୍ରୀରାମ ନବମୀ ଭକତି ବରଷେ
ଆଧ୍ୟାତ୍ମର ଧାରା ଛୁଟେ ।
ବିରାଜିତ ହୁଏ ବସନ୍ତ ରାଜ ଯେ
ଧରା ସୌନ୍ଦର୍ଯ୍ୟ ମଣ୍ଡିତ
ବିପୁଳ ଆଭାରେ ସୌନ୍ଦର୍ଯ୍ୟ ବିଭାରେ
ପ୍ରକୃତି ରାଣୀ ମଣ୍ଡିତ ।
ବିରାଜିତ ହୁଏ ବସନ୍ତ ରାଜ ଯେ
ସନ୍ତୁଳିତ ପରିବେଶ
ଗରମ, ବରଷା , ଶୀତ ଅର୍ନ୍ତହିତ
ସ୍ୱତନ୍ତ୍ର ବସନ୍ତ ଭାବ ।
