ବିଭା ମୟି ଶରଦ ଯାମିନୀ
ବିଭା ମୟି ଶରଦ ଯାମିନୀ
ବିଭା ମୟି ଏ ଶରଦ ଯାମିନୀ ର ଶୋଭା
ବିରାଜେ ବିଦିଗ ଦିଗ ସୁବିମଳ ପ୍ରଭା ।
ବିମଳ କୌମୁଦୀ ସ୍ନାତ ସୁସ୍ନିଗ୍ଧ ଯାମିନୀ
ବିଳାସ ବିଲୋଳ ବିଭା ଚଳ କାଦମ୍ବିନୀ ।
ବିଘୂର୍ଣିତ ବିହାୟସେ ଚାରୁ ଶୁଭ୍ର ହାସେ
ବିଭା ବିସ୍ତ।ରିଣ ଶଶୀ ଜୋଛନା ପ୍ରକାଶେ ।
ବିଶେଷ ଶରତ କାଳ ବିମଳ ବସୁଧା
ବାସେ ଫୁଲ ଫଳ ଶସ୍ୟ , ସୁମଧୁର ସୁଧା ।
ବରଷଇ ମହ ମହ ଲଳିତ ସୌରଭେ
ବର୍ଣ୍ଣାଢ଼୍ୟ ଉତ୍ସବ ସାଜ ବିଭୋଳ ସରବେ ।
ବିଭସିତ ତାରା ପଙ୍କ୍ତି କି , ଅବା ଦିପଳୀ
ବସାଇଛି ଶରଦ ଯାମିନୀ ଧାଡ଼ି ଧାଡ଼ି ।
ବନ , ଉପବନ ଜ୍ୟୋସ୍ନା ସ୍ନାତ ଶର୍ବରୀ ର
ବିଶୁଦ୍ଧ ପବନେ ସ୍ନିଗ୍ଧ ଶୀତ , ସୁରୁଚିର ।
ବିକଶିତ ପତ୍ର , ବଲ୍ଲୀ, ତରୁ ତୃଣ ରାଜି
ବିସ୍ତୀର୍ଣ୍ଣ ବିଲ ରେ ପକ୍ବ ଶାଳୀ ଶସ୍ୟ ରାଜି ।
ବିଶ୍ରୁଜଇ କମ, ହେମ , ମୟୂଖ - ଭାସ୍ଵର
ବିକଶିତ , ବିଶୋଭିତ , ଶୋଭାର ସମ୍ଭାର ।
ବିମଳ ହ।ସନୀ ଜ୍ୟୋସ୍ନା ପ୍ଲାବିତ ଯାମିନୀ
ବିକଶିତ ସରସୀ ରେ କୁମୁଦିନୀ ଧନୀ ।
ବାରବାନ -ବାନ ବର୍ଣ୍ଣ - ବିନିନ୍ଦିତ ବିଭା
ବିସ୍ତାରିତ ନୀପ ପୁଷ୍ପ ବିଟପୀ ରେ ଶୋଭା ।
ବିଲ , ପଠା , ହିଡ ମାଳେ କାଶ ଫୁଲ ଆଭା
ବିକ୍ଷିପ୍ତ ହୋଇଣ ଦିଶେ , ଚାମର କି ଅବା ।
ବିମୋହନ , ହେନା , ଚମ୍ପା , ଶେଫାଳି ସୌଗନ୍ଧେ
ବିଧଉତ ଗନ୍ଧବତୀ ଆହା କି ଆନନ୍ଦେ ।
ବାସ୍ନାୟିତ ଅଗସ୍ତି କୁସୁମ ରାଶି ଦୃମେ
ବାଳ ଇନ୍ଦୁ ତୁଲ ଦିଶେ , ବାଳେନ୍ଦୁ କିରଣେ ।
ବର୍ଣ୍ଣାଢ଼୍ୟ ଶରଦ ରାତ୍ରୀ ସୁଷମା ପ୍ରକାଶ
ବିକସିତ ବ।ସ୍ନ।ୟିତ ଶେଫାଳି ସୁହ।ସ ।
ବଡ ଶ୍ରଦ୍ଧା ଜନ ମାଏ ଜନ ମାନସ ରେ
ବୁଦ୍ ବୁଦ ପରାଏ ସ୍ନିଗ୍ଧ , ତୁହିନ ପାତ ରେ ।
ବିଶୋଭିତ ସୁବନାନୀ , ପଲ୍ଲୀ , ପୁର ଚୟ
ବିଲୋକନେ ମନ ପ୍ରାଣ କି ! ଆମୋଦ ମୟ ।
ବିଭା ମୟି ଶରଦୀୟ ଯାମିନୀ ପ୍ରକାଶ
ବିଲୋକନେ ଆହା ଚାରୁ ରୂପସୀ ର ବେଶ ।
ବିସ୍ତାରି ହୋଇଛି ଉଭା ପ୍ରକୃତି ସୁନ୍ଦରୀ
ବିମୋହନ କାନ୍ତି ରମ୍ୟ ଜ୍ୟୋତି ବନ ଗିରି ।
ବର୍ତ୍ତମାନ ପାଇଛି କି ଦିବ୍ୟ ଚେତନା ରେ
ବିବର୍ତ୍ତିତ ବିଭ୍ରାଜିତ ଶୋଭା ର ସମ୍ଭାରେ ।