ଭଉଣୀ ମୋ ସୁନାନାକୀ
ଭଉଣୀ ମୋ ସୁନାନାକୀ
ପାଖେଇ ଆସୁଛି ଶ୍ରାବଣ ପୂର୍ଣ୍ଣମୀ
ଉଇଁବ ଶରଦ ଜହ୍ନ
ବାନ୍ଧିବି ସରାଗେ ଭଉଣୀଠୁ ରାକ୍ଷୀ
ମନ ହୁଏ ଛନ୍ନ ଛନ୍ନ ।
ଲାଖି ଗଲେ ଆଖି ଦେଖଇ ସପନ
ଜହ୍ନ ମାମୁଁ ହୋଇ ଖୁସି
ହାତକୁ ବଢାଇ ଦେଉଛନ୍ତି ଯାଚି
ନୂଆ ଚିଜ ହସି ହସି ।
ଦେଖୁଛି ପରଖି ତନ୍ନ ତନ୍ନ କରି
ସେଇଟି ଉଜ୍ଜ୍ବଳ ରାକ୍ଷୀ
କହୁଛନ୍ତି ପ୍ରିୟ ଜହ୍ନମାମୁଁ ହସି
ପିନ୍ଧିନେ ଯତ୍ନ କରିକି ।
ସଜ ହୋଇଅଛି ପକ୍ଷୀରାଜ ଘୋଡା
ଚଢି ତୁ ପାରିବୁ ଉଡି
କୁଳନନ୍ଦନରେ ଭଉଣୀ ତୋହର
ସଜାଡିଛି ପୂଜାଥାଳୀ ।
ଶୁଣି ଭାଇ ଡାକ ଭାଙ୍ଗିଗଲା ନିଦ
ଉଠିଲି ମୁଁ ଆଖି ମଳି
ହୋଇ ମୁଁ ପ୍ରସ୍ତୁତ ବଢାଇଲି ହାତ
ପିନ୍ଧିଲି ରେଶମୀ ଡୋରୀ ।
ଭାବୁଛି ନିଜକୁ ବଡ ଭାଗ୍ୟବାନ
ଭଉଣୀ ମୋ ସୁନାନାକୀ
ସୋହାଗେ ସୁନ୍ଦର ଉତ୍ସାହେ ଆନନ୍ଦ
ଉଡେ ମୋର ମନ ପକ୍ଷୀ ।