ଭୁଲିବି ନାହିଁ

ଭୁଲିବି ନାହିଁ ଜୀବନେ କେବେ

ମାତୃଭୂମିର ଦାନ

ଯାହାର ପାଣି ପବନେ ଗଢା

ମୋର ଶରୀର ପ୍ରାଣ ।

ଭୁଲିବି ନାହିଁ ମାଆକୁ ମୋର

ଦେଇଛି ଯିଏ ଜନ୍ମ

ତାର ଅମୃତ ମୋ ଦେହେ ରକ୍ତ

ଅମୂଲ୍ୟ ତା'ର ପ୍ରେମ ।

ଭୁଲିବି ନାହିଁ ବାପାଙ୍କୁ କେବେ

ଯାହାର ହାତ ଧରି

ଚାଲି ଶିଖିଲି ପଥ ଦେଖିଲି

ବାଟୋଇ ଭାଇ ପରି ।

ଭୁଲିବି ନାହିଁ ମାତୃଭାଷାକୁ

କହିଲି ତୁଣ୍ଡେ କଥା

ମନେ ଜମାଟ ଭାବ ପ୍ରକାଶେ

ବଖାଣେ ହୃଦ ବ୍ୟଥା ।

ଭୁଲିବି ନାହିଁ ପରିବାରକୁ

ଅପାର ସ୍ନେହଶ୍ରଦ୍ଧା

ଦୁଃଖ ସୁଖରେ ସେ ସୁଖୀ ଦୁଃଖୀ

ଅତୁଟ ଡୋର ବନ୍ଧା ।

ଭୁଲିବି ନାହିଁ ଗୁରୁଙ୍କ ମୋର

ଅଜ୍ଞାନ ଦୂର କରି

ଜୀବନ ପଥେ ଜ୍ଞାନ ଆଲୋକ

ଦେଇଛନ୍ତି ସେ ଭରି ।

ମଣିଷ ଜନ୍ମ ଈଶ୍ୱର ଦାନ

କେବେ ଭୁଲିବି ନାହିଁ

ତାଙ୍କରି ପଦେ ଭକ୍ତି ପ୍ରଣତି

ଢାଳୁଛି ସଦା ମୁହିଁ ।