ଭୋକର ନାଟ

ଭୋକ,

ଏ କଥା ସତ, ପେଟ ପାଇଁ ଭୋକ, 

ଭୋକ ପାଇଁ ପେଟ

ଭୋକ ପାଇଁ ସମାଜ ଭିତରେ ସବୁ 

ଲାଗେ ତ ନାଟ |୧|

ପେଟର ଭୋକ ତ ଆଉଟୁ ପାଉଟୁ 

କରିଦିଏ ଜୀବନକୁ

ବଦଳାଏ ଦିଗ ମଣିଷର ସେଇ ଭୋକ 

ମେଣ୍ଟାଇବାକୁ |୨|

ଭୋକ,

ସେନେହ ପିରତି ଲାଳସାର ଭୋକ 

ପରା ଅନ୍ୟ ପ୍ରକାର

ନିଅଣ୍ଟ ପଡେ ସମାଜରେ ମଣିଷର 

ସମସ୍ତ ବ୍ୟବହାର |୩|

ଦେହର ଭୋକ ଯଦି ଥରେ ମନ 

ଭିତରେ ପ୍ରବେଶ କରେ

ସେ ହେଉ ନର ଅବା ନାରୀ, ସରବ 

ବ୍ୟଭିଚାର କରିଥାଏ |୪|

ଲୋଲୁପ ଦୃଷ୍ଟିରେ ଦେଖଇ ଏ ପୁରୁଷ 

ସ୍ତ୍ରୀର ଯଉବନକୁ

ବେଶୀ ସମୟ ନଲାଗେ ଧର୍ଷଣ ହତ୍ୟା 

ସବୁ କରିବାକୁ |୫|

ଭୋକ,

ପୁଅ ଜନମ ଭୋକରେ ନାରୀର ବଇରି 

ସାଜେ ଏକ ନାରୀ

ଗର୍ଭୋଦୟ ବେଳୁ ପାତର ଅନ୍ତର ପାଇଁ 

ଦୁଃଖ ଭୋଗେ ନାରୀ |୬|

କନ୍ୟାଟିଏ ବୋଲି ହତାଦର ହୁଏ ଧରାକୁ

ଛୁଏଁ ସେ ନାହିଁ

ଜନମ ପୂର୍ବରୁ ଜନନୀ ଜଠରୁ ସଫା ହୋଇ

ଯାଏ ସେହି |୭|

ଭୋକ,

କ୍ଷମତା ଓ ପ୍ରତିଷ୍ଠାର ଭୋକ ତ ଅଟେ 

ଜାଣ ସବୁଠୁ ଭୟଙ୍କର 

ଭୂଲ କରୁଛି କି ଠିକ୍ କରୁଛି, କିଛି ଜାଣି 

ନପାରଇ ସେ ନର |୮|

ଦୁନିଆର ସବୁ ଅପରାଧ ଦ୍ୱାରା ସୃଷ୍ଟିର କରି

ଥାଏ ଧ୍ୱଂସ ସେହି ମଣିଷ

ରକ୍ଷକ ହୋଇ ଭକ୍ଷକ ସାଜେ, ହଜିଯାଏ 

ତାଠୁ ସେନେହ ଶରଧା ହସ |୯|