ଭଙ୍ଗା ଦେଉଳର ଦେବୀ

ଦେଉଳଟିଏ ମୁଁ ତୋଳିନି ତୋପାଇଁ

ରଖିଛି ମୋ ଛାତିତଳେ

ନିତି ନିତି କିଆଁ ଛାତି ମୋ ଚିରୁଛୁ

କନ୍ଦାଉଛୁ ତୋର ଛଳେ I

କେତେ ଛଳ ଆଉ କରିବୁ କହ ଲୋ

କେତେ ଆଉ ଦେବୁ ଲୁହ

କେତେଦିନ ଆଉ ଭଙ୍ଗା ଦେଉଳରେ

ଅପୂଜା ରହିବୁ କହ I

ବାଟ ହୁଡିଥିବା ବାଟୋଇଟିଏ ମୁଁ

ତୁ ଏକ ମାଇଲ ଖୁଣ୍ଟ

ତୋ ପଖରେ ସଦା ନିର୍ବାକ ହୁଏ ମୁଁ

ଭାଙ୍ଗିଯାଏ ମୋର ଆଣ୍ଟ I

ଲିଭାଇ ଦେଲୁ ତୁ ନିଜ ହାତେ ସଖୀ

ମୋ ମନ ତଳର ରଙ୍ଗ

ଭାଙ୍ଗିଦେଇ ମୋର ସପନ ସଉଧ

କରିଦେଲୁ ବିକଳାଙ୍ଗ I

ଇନ୍ଦ୍ରଧନୁର ରଙ୍ଗ ସବୁ କିଆଁ

ନିଜହାତେ ପୋଛି ଦେଲୁ

ଅନ୍ଧକାର କଲୁ ମୋ ମନ ଆକାଶ

ଜହ୍ନକୁ ଲୁଚାଇ ଦେଲୁ I

ଚିର ସବୁଜ ଲୋ ମନଟି ତୋହର

ସବୁଜିମାଭରା ଦେହ

ବଇଶାଖୀ ଝାଞ୍ଜି କିଆଁ ପାଲଟିଲୁ

ଜାଳିଦେଲୁ ମୋର ମୁହଁ I