ଭିଟାମାଟି-ବର୍ଜ୍ୟ ବସ୍ତୁ
ଭିଟାମାଟି-ବର୍ଜ୍ୟ ବସ୍ତୁ
ନୁହେଁ କିଛି ବର୍ଜ୍ୟ କହିବି ମୁଁ ଆର୍ଯ୍ୟ
ହେଉ ବସ୍ତୁ ଅବା ଜୀବ
ଶ୍ରମ ସାଧନାରେ ସଂସ୍କାର ମାର୍ଜନା
ପ୍ରୟୋଗ ଉତ୍ତମ କାର୍ଯ୍ୟ ।
ପ୍ରାକୃତିକ ସ୍ଥିତି ଜୀବନ ପ୍ରକ୍ରିୟା
ସନ୍ତୁଳନ ମହାଯଜ୍ଞ
ସହ ଅବସ୍ଥାନେ ବିକଶେ ଜୀବନ
ଉନ୍ନତି ହୁଏ ସାଧନ ।
ଉପନୀତ ହେଲେ ବାର୍ଦ୍ଧକ୍ୟ ଅବସ୍ଥା
ହୁଏନି ମଣିଷ ବର୍ଜ୍ୟ
ଉପଯୁକ୍ତ ଯତ୍ନ ସେବା ଓ ଶୁଶ୍ରୁଷା
ଅବଶ୍ୟ ନେବା କର୍ତ୍ତବ୍ୟ ।
ନିତ୍ୟ ବ୍ୟବହାର୍ଯ୍ୟ ବସ୍ତୁ ଓ ପଦାର୍ଥ
ହୋଇଲେ ଜର୍ଜର ଭଗ୍ନ
ଏଣେ ତେଣେ ତାକୁ ଫୋପାଡି ନଦେଇ
କରିବା ପୁନଃ ଚକ୍ରଣ ।
ରୋଧ କରିବାକୁ ଅଙ୍ଗାରକ ମାତ୍ରା
ବଢ଼ାଇବା ସବୁଜିମା
ପରିତ୍ୟକ୍ତ ଜଳ ନିଷ୍କାସନ ପାଇଁ
ନିବୁଜ ନାଳ ନର୍ଦ୍ଦମା ।
ବର୍ଜ୍ୟ ଆବର୍ଜନା ଉପଯୁକ୍ତ ଭାବେ
ହୋଇଲେ ସୁବିନିଯୋଗ
ବିପଦ ନ ହୋଇ ସମ୍ପଦ ଭାବରେ
ନିଶ୍ଚିତ ହୋଇବ ଗଣ୍ୟ ।
ବିଦ୍ୟା ବଳ ବୁଦ୍ଧି ପଦ କ୍ଷମତାର
ନ କରି ଦୂରୁପଯୋଗ
ସୃଷ୍ଟିର ମଙ୍ଗଳ ବିଧାନ ନିମନ୍ତେ
ବିଜ୍ଞ କର ସହଯୋଗ ।
-----