ଭିଜା ମାଟି ର ବାସ୍ନା

ମେଘ ଆକାଶ ରେ ବାଦଲ ମେଳରେ

ଧଳା କଳା ରଙ୍ଗେ ପାଲିଙ୍କି ସଜା

ବରଷା ରାଣୀ ତ ଧରିତ୍ରୀ ଛୁଇଁବ 

ଦେଖ ତ ଶୁଭୁଛି ବାଣ ଓ ବାଜା |

ବାଦଲ ଫଟାଇ ଆନ ମନା ହୋଇ

ଓହ୍ଲାଇବ ଯେବେ ବରଷା ରାଣୀ

ମାଟିରୁ ଉଠିବ ଭୁରୁ ଭୁରୁ ବାସ୍ନା

ଦେହ ମନକୁ ଯେ ନେବ ଯେ ଟାଣି ।

ମାଟିର ବାସ୍ନାରେ ମହକିବ ଧରା

କୃଷକ ମନରେ ରାଗ ରାଗିଣୀ

ମାଟିର ମଣିଷ ମାଟିରେ ତା ଆଶ

ମାଟି ତ ଜୀବନ ପରଶ ମଣି ।

ଭିଜା ମାଟି ଦେହୁ ଉଠି ଆସୁ ଥିବ

ତୃପ୍ତି ଭରା ଏକ ସୁନ୍ଦର ଛିଟା

ସବୁଜ ପତରେ ଲେଖିଦବ ସିଏ

ପୃଥିବୀ ଆକାଶ ପ୍ରେମ ସଂହିତା |

ଭିଜା ମାଟି ବାସ୍ନା ସଂଚ଼ରି କହିବ

ସବୁଜ ଗାଥାର ଗ୍ରନ୍ଥ ସଂହିତା

ପୃଥିବୀ ମାଆର ଧୂସର ପଣତେ

ଆଙ୍କି ହୋଇଯିବ ସବୁଜ ଚିତା |

ଟିପି ଟିପି ପାଣି ଭିଜାମାଟି ବାସ୍ନା

ମହକାଇ ଦେବ ଆଶା ମନ୍ଦିର

ସେଇ ମହକରେ ବାସ୍ନାୟିତ ହେବ

ଆଶା ଆକାଂକ୍ଷାର ସ୍ବପ୍ନ ସହର ।

ଭିଜା ମାଟି ବାସ୍ନା ଆଙ୍କି ଦେବ ପରା

କୃଷକ ମନରେ ସୃଷ୍ଟି ର ଛବି

ମନ ଗହନ ରେ ଜଗାଇ ଦେବ ସେ

ଅସରା ଶକତି ଉତ୍ପତ୍ତି ରବି |

ବରଷା ବରଷୁ ସୀମା ସରହଦେ

ମାଟିର ବାସ୍ନାରେ ଜଗତ ଭରୁ

ସଭିଙ୍କ ମନକୁ ସମୁଜ୍ଜ୍ବଳ କରି

ଜଗତର ବନ୍ଧୁର ଉପାଧି ପାଉ ।