ଭାସିଯାଆ ଡଙ୍ଗା

କୁନି ବିନି ଦୁହେଁ ପଢୁଛନ୍ତି ପାଠ

ବିଦ୍ଯାପୀଠେ ସୁନାଚାଟ

ତିଆରିଛନ୍ତି ସେ ପାଲଟଣା ଏକ

ନମୁନା ଟିକି ବୋଇତ ।

ଅଝଟିଆ ମୁନା ଅଟେ କୋଡପୋଛା

ଆଦରର ସାନଭାଇ 

ଛିଗୁଲିଇ ତାଙ୍କୁ କହିଲା ଭଉଣୀ

ଡଙ୍ଗା ତ ଭାସିବ ନାହିଁ ।

ଆସେନି ତୁମକୁ ବୋଇତ ତିଆରି

ତୁମେ ଦୁହେଁ ବଡ ଓଲି

ଗୋଲ ଗୋଲ ଆଳୁ ପାଇଲେ ନମ୍ବର

ହସି ବଜାଇବି ତାଳି ।

କୁନି ବିନି ଦୁହେଁ ଫେରାଦ କରିଲେ

କହିଲେ ମାଆ ବୁଝାଇ 

କରନାହିଁ ପାଟି ବାପା ଆସିଯାନ୍ତୁ

ମୁଣ୍ଡ ମୋର ଚୋବା ନାହିଁ ।

ଶୁଣି କଥା ବାପା ଡାକିଲେ ପିଲାଙ୍କୁ

ଆସ କୁନି ବିନି ମୁନା

ଯିବା ଆମେ ସବୁ ନଈ ଦେଖିବାକୁ

ତୁଟାଇବା ତୁମ ପାଲା ।

ସଙ୍ଗେ ଧରି ଚାଲ ତୁମର ନମୁନା

ଶୋଲ ତିଆରିର ଡଙ୍ଗା

ଭସାଇବା ତାକୁ ପାଣିରେ ନଈରେ

ମୁନାକୁ ଲାଗିବ ମଜା ।

ଦେଖି ନଈ ପାଣି ମୁନା ତ ଛାନିଆଁ

କହିଲା ଲାଗୁଛି ଡର

ଲାଉ ହୋଇ ବସି ବାପାଙ୍କ ପିଠିରେ

ଚାହୁଁଥିଲା ଜଳଜଳ ।

ଭାସିଲା ପାଣିରେ ନମୁନା ବୋଇତ 

ଗତିକଲା ପବନରେ

କୁନି ବିନି ଦୁହେଁ ହେଲେ ଭାରି ଖୁସି

କହିଲେ କଥା ନସରେ ।

ନାଚିକୁଦି ଖେଳି ବୁଲାବୁଲି ପରେ

ଆସିଲେ ଘରକୁ ଫେରି

ମୁନା କହୁଥିଲା ସୁନା ମୋ ଭଉଣୀ

କିଏ ଅଛି ତାଙ୍କ ସରି ।