ବିବାହ :ଏକ ବନ୍ଧନ

ବିବାହ ତ ଏକ ପବିତ୍ର ବନ୍ଧନ

ମନେ ରଖିଥିବୁ ଝିଅ

ଦାମ୍ପତ୍ୟ ଜୀବନ ଦେବାଳୟ ସମ

ସ୍ୱାମୀ ଯେଉଁଠାରେ ଦିଅଁ ।

ବାପଘର ସୁଖ ଭୁଲିଯିବୁ ମନୁ

ହେଲାପରେ ଝିଅ ବାହା

ସଭିଙ୍କୁ ଆଦର ସେନେହ କରିବୁ

କାଳିଆ ହେବେ ତୋ ସାହା ।

ଦେଇଥିବୁ ମନ ବିଭୂଙ୍କ ପୟରେ

ଭକତିରେ ହୃଦ ଜିଣି

ସଙ୍କଟରେ ସ୍ୱାମୀ,ଶାଶୁ,ଶଶୁରଙ୍କ

ମନ ନେଉଥିବୁ କିଣି ।

ବରଷିବୁ ସ୍ନେହସିକ୍ତ କୃପା ବାରି

ଦେବୁନି କା ମନେ ବ୍ୟଥା

ମିଠା କଥା ସଦା ମୁଖେ ଉଚ୍ଚାରିବୁ

କହିବୁନି କଟୁ କଥା ।

ପରିବାର ଜନେ ଶ୍ରଦ୍ଧା ରଖିଥିବୁ

ସାଧୁସନ୍ଥେ ଦେଇ ମତି

ଶାଶୁ ଶଶୁରଙ୍କ ସେବା କରୁଥିଲେ

ଜୀବନେ ଲଭିବୁ ମୁକ୍ତି ।

ଜୀବନସାଥୀଙ୍କ ମନ ମୋହୁଥିବୁ

ହୃଦୟ ଦେବତା ମଣି

ଲୟ ରଖିଥିବୁ ସ୍ୱାମୀଙ୍କ ସେବାରେ

ସିଏ ତୋ ସଂପଦ ଖଣି ।

ସଂସାର ସାଗରୁ ସୁଖେ ହେବୁ ପାରି

ସାଜିବେ ସେ ତୋର କାତ

ଦାମ୍ପତ୍ୟ ଜୀବନ ପ୍ରତି ପାବଚ୍ଛରେ 

ସାହା ହେବେ ଜଗନ୍ନାଥ ।