ଭାରତୀୟ ଆମେ

ଭାରତୀୟ ଆମେ ଦୀପ୍ୟମାନ ଭିତ୍ତି ଆର୍ଯ୍ୟଭୂମିର ଦାୟାଦ  

ଭାଇଚାରା ଯା' ର ପବିତ୍ର ମହକ ଜାଳିଦିଏ ଭେଦାଭେଦ । 

ତ୍ରିରଙ୍ଗା ଯାହାର ଉଡେ ଫଡଫଡ ଗାଇ ଶାନ୍ତି ମୈତ୍ରୀ ବାର୍ତ୍ତା  

ତ୍ୟାଗ ଶୌର୍ଯ୍ୟ ଆଉ ବିଶ୍ୱାସ ଭରସା ସତ୍ୟର ବିଜୟ କର୍ତ୍ତା। 

ସତ୍ୟ ଧର୍ମ ନ୍ୟାୟ ବିଜୟ ସର୍ବଦା ଅଶୋକଚକ୍ର ସୂଚାଏ  

ବିଭିନ୍ନତା ମଧ୍ୟେ ଏକତାର ଭାବ ଭାରତରେ ଦେଖାଦିଏ । 

ହିନ୍ଦୁ ଇସଲାମ ବୌଦ୍ଧ ଖ୍ରୀଷ୍ଟ ଜୈନ ବହୁଧର୍ମ ଲୋକଛନ୍ତି  

ଧର୍ମ ନିରପେକ୍ଷ ରାଷ୍ଟ୍ର ମୋ ଭାରତ ମାନବିକତା ବାଣ୍ଟନ୍ତି। 

ଦେଶଦ୍ରୋହୀଙ୍କର ହୀନ ଷଡଯନ୍ତ୍ର ଜାତିଆଣଭାବ ମନ  

ଜାତୀୟ ସଂହତି ଦୁର୍ବଳ କରୁଛି କଳୁଷିତ କରେ ଜନ । 

ଅଧର୍ମ ନାମକୁ ଧର୍ମରେ ଆରୋପି ପ୍ରେମଧର୍ମ ଶିକ୍ଷାଦିଏ  

ସନ୍ତ୍ରାସବାଦୀଙ୍କ ହାତେ ହାତ ରଖି ସ୍ୱକୀୟ କ୍ଷୟ କରାଏ । 

ଆମେ ଗଢିବା ଗୋଟିଏ ଜାତି ଗୋଟିଏ ଧର୍ମ ନାଁ ଯା'ର ପ୍ରେମ  

ମାତୃଭୂମିର ମାନ ରଖିବା ବିସର୍ଜି ହିଂସକ ସ୍ୱାର୍ଥ କର୍ମ ।