ଭାଇଚାରା
ଭାଇଚାରା
କେଭେଁ କାହାକେ କେନ୍ ଜିନିଷ୍'କେ
ହୀନ୍ କି ଛୋଟ୍ ନି ଭାବ୍'ବୁ ମନେ
ଅନ୍'ଦେଖା ତାକେ ନି କର୍'ବୁ
ତାର୍'ନୁ ଉପକାର୍ ପାଏବୁ ଦିନେ l
କେଭେଁ କାହାକେ ବଢ଼େଟେ ଲୋକ୍
ମନେ ଭାବିକରି ନି ଯିବୁ ଡରି
ଲକ୍ଷ୍ଯ ରଖି ତୁଇଁ କରମ୍ କଲେଁ
ତାର୍'ଠାନୁ ଦିନେ ଯିବୁରେ ବଲି l
ଯେଡ଼େ ଧନୀ ହଉ ଯେଡ଼େ ମାନୀ ହଉ
ଏକ୍'ଲା କେଭେଁ କେ ନି ପାରେ ଚଲି
ଗୁଟେ ହାତେ କେଭେଁ ତାଲି ନି ବାଜେ
ଗୁଟେ ପତ୍'ରେଁ କେଭେଁ ନି ହୁଏ ଖଲି l
ଧନୀ ଭି କରିଛେ ଗରିବ୍'କେ ଆଶ୍
ଗରୀବ୍ ଭି କରିଛେ ଧନୀକେ
ସମିଆଁର୍ ଚକର୍ ତଲ୍ ଉପର୍ ହେଇ
ଦେଖ୍'ତ କିନ୍ଦିରି ବୁଲୁଛେ l
ଧନୀ ବଲି କେଭେଁ ଗରବ୍ ନି କର୍'ବୁ
ଗରୀବ୍ ବୋଲି ମନ୍ ନି କର୍'ବୁ ଉନା
ସତ୍ କରମ୍ କରି ଧନ୍ ଅର୍ଜିବୁ
ଭାଇଚାରା ରଖି ଚଲ୍'ବୁ ସୁନା l